პუტინს საბჭოთა კავშირის აღდგენა სურს, ამაში შედის საქართველოც, სადაც ბევრ აქტივობას ვხედავთ - იოჰან ვადეფული

გერმანიის საგარეო საქმეთა მინისტრის იოჰან ვადეფულის განცხადებით, ვლადიმერ პუტინს საბჭოთა კავშირის აღდგენა სურს და სხვა ქვეყნებთან ერთად მასში საქართველოს დაბრუნებასაც მოიაზრებს.

"არასოდეს არ უნდა დაგვავიწყდეს, რომ პუტინმა მიუნხენის უსაფრთხოების კონფერენციაზე ერთხელ თქვა, მისთვის მე-20 საუკუნის უდიდესი კატასტროფა საბჭოთა კავშირის დაშლა იყოო.

როდესაც გერმანელი ხარ, ამაზე ცოტა არ იყოს გაოცებული რჩები და ამბობ, რომ ეს ნამდვილად არ ყოფილა მე-20 საუკუნის უდიდესი კატასტროფა. მაგრამ კარგი, თუ ამას ასე მივიღებთ, მაშინ უნდა ითქვას თუ ეს უდიდესი კატასტროფა იყო, მას ალბათ ამის გამოსწორება სურს.

ეს ნიშნავს, რომ ნამდვილად არსებობს პრეტენზია იმისა, რომ აღადგინოს ის, რაც ოდესღაც საბჭოთა კავშირი იყო. ამაში შედის უკრაინა, ამაში შედის ახლა საქართველოც, სადაც დიდ აქტიურობას ვადევნებთ თვალს. ამაში შედის მოლდოვაში ვითარების არევა და, რა თქმა უნდა, ბალტიისპირეთიც კვლავ შევიდოდა.

ეს უკანასკნელნი ახლა ევროკავშირისა და ნატოს წევრები არიან“, - განაცხადა გერმანიის საგარეო საქმეთა მინისტრმა გერმანულ ტელეარხთან NTV-თან ინტერვიუში.