ქართული E-commerce პლატფორმა Bomo.ge 2026 წელს ექსპორტზე ორიენტირდება|მაია ზავრაშვილი

ქართული ელექტრონული კომერციის პლატფორმა Bomo.ge, რომელიც სამშენებლო და ინდუსტრიული მასალების რეალიზაციაზეა ორიენტირებული, 2026 წელს ექსპორტზე ორიენტირდება.

ამის შესახებ BMGTV-ს გადაცემა „წერტილში“ Bomo.ge-ს დამფუძნებელმა მაია ზავრაშვილმა განაცხადა, სადაც ონლაინ პლატფორმის 2025 წლის შედეგებზე ისაუბრა.

პლატფორმა 2024 წლიდან წარმატებით ოპერირებს საქართველოს ბაზარზე და აერთიანებს როგორც ადგილობრივი წარმოების, ასევე იმპორტირებულ პროდუქტებს. Bomo.ge მუშაობს „მწარმოებლიდან მომხმარებლამდე“ პრინციპით, რაც საშუალებას აძლევს მომხმარებლებს პირდაპირ მწარმოებლისგან შეიძინონ პროდუქცია, ხოლო მწარმოებლებს - შეამცირონ შუამავლური ხარჯები და გაზარდონ კონკურენტუნარიანობა.

„საქართველოს ბაზრის ზომა ჩვენი ტიპის E-commerce-ებს გრძელვადიან პერსპექტივაში დიდ შესაძლებლობებს არ უჩენს. ჩვენი გზა საერთაშორისო ბაზრებისკენ მიდის. 2026 წლის მნიშვნელოვანი სიახლე სწორედ სამშენებლო პროდუქციის დაექსპორტებაა. უკვე დავიწყეთ ამ ტიპის მასალების განთავსება და პირველადი კომუნიკაციები,“ - აცხადებს მაია ზავრაშვილი.

მისივე განმარტებით, პლატფორმა არ ცდილობს ტექნოლოგიურად გაეჯიბროს გლობალურ გიგანტებს, არამედ პოზიციონირებს როგორც ეფექტური ბიზნეს-ხელსაწყო.

„Bomo.ge-ს პლატფორმას უფრო აღვიქვამთ, როგორც ტიპურ ბიზნეს-ხელსაწყოს იმისთვის, რომ შენი ბიზნესი აწარმოო და გახვიდე გარეთ. ტექნოლოგიურად ვერ გაეჯიბრები გიგანტებს, არც მაგისი რესურსი გვაქვს და არც ამბიცია, მაგრამ გვაქვს გარკვეული ტიპის ნიშური პროდუქტები“, - აღნიშნა მან.

„წერტილთან“ ინტერვიუში მაია ზავრაშვილმა ასევე ისაუბრა მის პორტფელში არსებულ ახალ კომპანიაზე - Stonex-ზე, რომელიც ქვემო ქართლის რეგიონში ოპერირებისთვის ემზადება.

„Stonex-ი სხვა ჯგუფთან კოლაბორაციით შექმნილი კომპანიაა. მიმართულება - სამშენებლო მასალების მოპოვება და წარმოება. ქვემო ქართლის რეგიონში გვაქვს ინტერესი კონკრეტულ კარიერზე, სადაც პირველადი სამუშაოები უკვე ჩატარებულია. 2025 წელი მოსამზადებელი ეტაპია და დიდი იმედი გვაქვს, რომ 2026 წელს უკვე რეალურ საოპერაციო ეტაპზე გავალთ,“ - ამბობს ის.