ქოლცენტრების საქმეზე უკრაინის გენერალური პროკურორი თანამდებობიდან გადააყენეს - კრავჩენკომ ქვეყანა დატოვა
უკრაინის პრეზიდენტმა ვოლოდიმირ ზელენსკიმ ქვეყნის გენერალური პროკურორი რუსლან კრავჩენკო გათავისუფლებულად გამოაცხადა და პარლამენტს მისი საბოლოო გადაყენების წინადადებით მიმართა.
გადაწყვეტილებას წინ უძღოდა კრავჩენკოს მიერ უკრაინის საზღვრის ღამით გადაკვეთა, რაც უწყებაში მიმდინარე მსხვილ კორუფციულ სკანდალს და თაღლითური ქოლცენტრების საქმეს უკავშირდება.
არსებული ინფორმაციით, კრავჩენკომ გადადგომის შესახებ განცხადება მას შემდეგ დაწერა, რაც უკრაინის ეროვნულმა ანტიკორუფციულმა ბიურომ გენერალურ პროკურატურაში მოქმედი სავარაუდო დანაშაულებრივი ჯგუფი გამოავლინა.
გამოძიების ვერსიით, უწყების მაღალჩინოსნები თაღლითური ქოლცენტრებისგან საქმიანობის ხელშეუხებლობის სანაცვლოდ სისტემატურად იღებდნენ ქრთამს და მილიონობით დოლარის უკანონო შემოსავალს ათეთრებდნენ.
გამოძიების ფარგლებში კრავჩენკოს სამუშაო კაბინეტი გაჩხრიკეს, ხოლო ბიუროს მიერ გამოქვეყნებულ აუდიოჩანაწერებში ფიგურირებს პირი, მეტსახელად „ბოსი“, რომლის მონაცემებიც კრავჩენკოს სრულად ემთხვევა.
აღსანიშნავია, რომ ყოფილი გენერალური პროკურორი დანაშაულში მონაწილეობას უარყოფს და ამ ეტაპზე მისთვის ბრალი ოფიციალურად არ წაუყენებიათ.
შეგახსენებთ, რუსლან კრავჩენკო უკრაინის გენერალური პროკურორის თანამდებობას 2025 წლის ივლისიდან იკავებდა, მანამდე კი ის ქვეყნის სახელმწიფო საგადასახადო სამსახურს ხელმძღვანელობდა.
BM.GE
წყარო: bm.ge