ქურდობა, ნარკოტიკები, ძალადობა... - საქართველოში არასრულწლოვანთა დანაშაულის სტატისტიკა გაიზარდა

2026 წლის პირველ ნახევარში საქართველოში მსჯავრდებული არასრულწლოვანი პირების რაოდენობა 363-მდე გაიზარდა. გასული წლის ამავე პერიოდში ეს რიცხვი 238 იყო.

საქსტატის მიერ გამოქვეყნებული სამართლებრივი სფეროს მაჩვენებლების მიხედვით, მსჯავრდებულთა უმრავლესობა 341 ბიჭი იყო, 22 კი გოგო.

დანაშაულის სახეობების მიხედვით, ყველაზე ხშირად არასრულწლოვანები ქურდობის ბრალდებით იყვნენ მსჯავრდებულნი. წლის პირველ ნახევარში მათ მიერ ქურდობის 189 ფაქტია აღრიცხული.

ნარკოტიკების უკანონო დამზადება, შეძენა , შენახვისთვის 12 მსჯავრდებულია, ჯანმრთელობის განზრახ მძიმე დაზიანებისთვის 9 პირი, გაუპატიურებისა და განზრახ მკვლელობისთვის კი 1-1 პირი.

წლის პირველ ნახევარში გაიზარდა თავისუფლება აღკვეთილი არასრულწლოვანების რაოდენობაც. მათმა რიცხვმა 126 შეადგინა, მაშინ როდესაც გასულ წელს 67 პირი იყო.