რა ფასში კერავს ჩინური კომპანია სასკოლო ფორმას, რომელსაც სახელმწიფო 95 ლარად გაყიდის

გივი მიქანაძემ გამოსცა ბრძანება, რომლითაც საჯარო სკოლების დაწყებითი საფეხურის მოსწავლეთა სასკოლო ფორმის საცალო ფასები განისაზღვრა. დოკუმენტის მიხედვით, ბიჭისა და გოგოს სასკოლო ფორმის კომპლექტის ფიქსირებული ღირებულება 95 ლარია.

ბრძანების თანახმად, სასკოლო ფორმის თითოეული ერთეულის რეალიზაციის ფასი ასეთია:

• სასკოლო პიჯაკი (ბიჭისთვის) – 45 ლარი; • სასკოლო შარვალი (ბიჭისთვის) – 25 ლარი; • სასკოლო პიჯაკი (გოგოსთვის) – 45 ლარი; • სასკოლო შარვალი (გოგოსთვის) – 25 ლარი; • სასკოლო ქვედაკაბა (მოკლე ან გრძელი) – 25 ლარი.

შესაბამისად, ბიჭის სასკოლო ფორმის კომპლექტი, რომელიც ერთი პიჯაკისა და ორი შარვლისგან შედგება, 95 ლარი ღირს, ხოლო გოგოს კომპლექტი, რომელიც პიჯაკს, შარვალსა და ქვედაკაბას მოიცავს, ასევე 95 ლარად გაიყიდება.

მინისტრის ბრძანებაში აღნიშნულია, რომ ეს ფასები ფიქსირებულია და სასკოლო ფორმის განსხვავებული ღირებულებით რეალიზაცია დაუშვებელია.

2026 წლის 19 ივნისს გაფორმებული ხელშეკრულების მიხედვით, შპს „საგანმანათლებლო რესურსებმა" საქართველოში რეგისტრირებულ შპს „გლორი ტექსტილ ინდასთრისთან" 45 658 840 ლარის (დღგ-ის ჩათვლით) კონტრაქტი გააფორმა. შესყიდვის ობიექტს 1 801 000 ერთეული სასკოლო ფორმა წარმოადგენს.

კონტრაქტში მითითებული ფასების მიხედვით, მწარმოებლისთვის თითოეული ერთეულის ღირებულება ასეთია:

• გოგოს პიჯაკი – 39.61 ლარი; • ბიჭის პიჯაკი – 35.43 ლარი; • გოგოს კაბა (ქვედაკაბა) – 16.76 ლარი; • ბიჭის შარვალი – 19.65 ლარი; • გოგოს შარვალი – 19.65 ლარი.

შესაბამისად, ხელშეკრულების მიხედვით, ბიჭის სასკოლო ფორმის კომპლექტის ღირებულება 74.73 ლარს შეადგენს, ხოლო გოგოს კომპლექტის – 76.02 ლარს. ეს ნიშნავს, რომ სახელმწიფოს მიერ დადგენილ საცალო ფასსა და მწარმოებლის კონტრაქტით განსაზღვრულ ღირებულებას შორის სხვაობა ბიჭის ფორმაზე 20.27 ლარია, ხოლო გოგოს ფორმაზე – 18.98 ლარი.