რა ქონებას ფლობს მამუკა ხაზარაძე?

პარტია "ლელოს" ერთ-ერთმა დამფუძნებელმა და ლიდერმა მამუკა ხაზარაძემ სახელმწიფო აუდიტის სამსახურში ქონებრივი დეკლარაცია წარადგინა.

მამუკა ხაზარაძის ქონებრივ დეკლარაციაში ასახულია მის საკუთრებაში არსებული აქტივები, უძრავი ქონება, საბანკო ანგარიშები და აქციები, ასევე გასულ წელს მიღებული შემოსავლები და ხარჯები.

დოკუმენტის თანახმად, მამუკა ხაზარაძის უმსხვილეს აქტივს წარმოადგენს TBC PLC-ის 5.3 მილიონი აქცია, რაც ბანკის მთლიანი კაპიტალის 9.6%-ს შეადგენს. ამჟამად აღნიშნული აქციების ღირებულება 260 მილიონ გირვანქა სტერლინგს, ანუ 945 მილიონი ლარს შეადგენს.

მიღებული შემოსავლებიდან უმსხვილესი სწორედ "თიბისი ბანკის" დივიდენდს წარმოადგენდა. დოკუმენტის თანახმად, მამუკა ხაზარაძემ გასულ წელს 12.8 მილიონი გირვანქა სტერლინგის, ანუ 46.7 მილიონი ლარის დივიდენდი მიიღო TBC PLC-დან.

მამუკა ხაზარაძის ქონებრივ დეკლარაციაში მითითებულია აქციების რეალიზაციის კონტრაქტიდან 10 მილიონი დოლარის (26.9 მლნ ლარის) შემოსავალი და უძრავი ქონების გაქირავებიდან 88.4 ათასი ევროს შემოსავალი. ქონებრივ დეკლარაციაში ასევე მითითებულია მისი მეუღლის, ირინე ხაზარაძის მიერ მიღებული დივიდენდი სადისტრიბუციო კომპანია "მეგაკოდან" 900,000 ლარის ოდენობით. დეკლარაციის თანახმად, მამუკა ხაზარაძის მეუღლე ამ კომპანიაში 15%-ის წილს ფლობს. გარდა ამისა მამუკა ხაზარაძე ქონებრივ დეკლარაციაში უთითებს სხვადასხვა კომპანიის, მათ შორის "ლისი ლეიქ დეველოფმენთის"; GRDC ჰოლდინგის; "ჯორჯია რეალ ისთეითის"; "ნაფარეულის მამულის"; "როიალ ხვანჭკარას"; "ვაზისუბნის მამულის" და სხვა კომპანიების წილებს.

რაც შეეხება საბანკო ანგარიშებს, გარდა TBC ბანკისა, მამუკა ხაზარაძე ქონებრივ დეკლარაციაში უთითებს შვეიცარიული ბანკის Vontobel-ის ანგარიშებს, სადაც საერთო ჯამში 8.8 მილიონი გირვანქა სტერლინგი (32 მლნ ლარი) აქვს განთავსებული.

მამუკა ხაზარაძე ქონებრივ დეკლარაციაში ასევე უთითებს იმ სესხებს რომლებიც მის მიერ საკუთარ კომპანიებზე და დაკავშირებულ პირებზე აქვს გაცემული, აღნიშნული კრედიტების ჯამური მოცულობა 5.5 მილიონ დოლარს, 5.1 მილიონ ლარს და ნახევარ მილიონ ევროს აღემატება.