რა ვიცით ლარის სტეიბლკოინ GELT-ის შესახებ?

საქართველოს მთავრობის მხარდაჭერით, ციფრული აქტივების ეკოსისტემის უმსხვილესი კომპანია Tether-ი ქართული ლარის ციფრული ანალოგის, სტეიბლკოინ GELT-ის გამოშვებას გეგმავს.

კომპანიის განმარტებით, ახალი ფინანსური ინსტრუმენტი ტრანზაქციის ხარჯების შემცირებას, თითქმის მომენტალურ ანგარიშსწორებას, პროგრამირებად გადახდებსა და ციფრულ ფინანსურ სისტემებში კაპიტალის უფრო ეფექტურ მოძრაობას უზრუნველყოფს. ინიციატივამ ხელი უნდა შეუწყოს ტრანსსასაზღვრო ვაჭრობას, ფინტექ-სექტორის განვითარებას, ციფრულ გადახდებსა და რეგიონის მასშტაბით პროგრამირებად ფინანსურ ინფრასტრუქტურაზე ხელმისაწვდომობის გაფართოებას.

მნიშვნელოვანია ითქვას, რომ ეს გადაწყვეტილება გლობალურ ფინანსურ სისტემაში მიმდინარე სტრუქტურულ ცვლილებებს ეფუძნება, რომელთა ფარგლებშიც სტეიბლკოინები გადახდებისთვის და საერთაშორისო გზავნილებისთვის სულ უფრო აქტიურად გამოიყენება.

რაც შეეხება საკანონმდებლო ასპექტებს, პროექტი საქართველოს მთავრობისა და ეროვნული ბანკის მიერ ბოლო წლებში განხორციელებულ რეფორმებს ეფუძნება. ამასთან, ქართული მოდელი თავსებადია აშშ-ის რეგულაციებთან, მათ შორის GENIUS Act-თან, რაც ქვეყანას ამერიკულ ციფრულ ჩარჩოსთან თავსებადობის შესაძლებლობას აძლევს.

პარალელურად, მიმდინარე პროცესს ოფიციალური პირებიც გამოეხმაურნენ. საქართველოს პრემიერ-მინისტრის, ირაკლი კობახიძის განცხადებით, ქვეყანა Tether-თან ერთად უფრო გამჭვირვალე და ციფრულად გაძლიერებული ფინანსური სამყაროს საფუძვლებს აყალიბებს.

კომპანიის აღმასრულებელმა დირექტორმა, პაოლო არდოინომ კი აღნიშნა, რომ სტეიბლკოინები გლობალური ფინანსების ინფრასტრუქტურულ ნაწილად იქცა, საქართველოს მიერ შექმნილი მკაფიო მარეგულირებელი გარემო კი ინოვაციების ბაზისს ქმნის.

საყურადღებოა, რომ GELT-ის სტრუქტურის, ბაზარზე ჩაშვებისა და რეგულატორული იმპლემენტაციის შესახებ დამატებითი დეტალები მოგვიანებით გახდება ცნობილი.