რაგბის კავშირი World Rugby-ს სანქციებს ეთანხმება და ანტიდოპინგურ რეფორმას იწყებს - განცხადება
საქართველოს რაგბის კავშირი ეხმაურება მსოფლიო რაგბის გადაწყვეტილებას, რომლის მიხედვითაც, 2023 წლის მსოფლიო ჩემპიონატის წინ საქართველოს ნაკრებში ანტიდოპინგური წესების დარღვევის რამდენიმე შემთხვევა გამოვლინდა.
დარღვევების გამო, სხვადასხვა ვადით დისკვალიფიკაცია მიესაჯა ნაკრების ექვს მოთამაშესა და პერსონალის ერთ წევრს. აღნიშნულიდან გამომდინარე, მსოფლიო რაგბიმ არასათანადო ქცევის ბრალდება უშუალოდ საქართველოს რაგბის კავშირსაც წარუდგინა.
საქართველოს რაგბის კავშირში აცხადებენ, რომ ისინი ეთანხმებიან მსოფლიო რაგბის გადაწყვეტილებას და სრულად თანამშრომლობენ გამოძიებასთან. კავშირმა, ფულად ჯარიმასთან ერთად, აიღო ვალდებულება, გაატაროს მასშტაბური რეფორმა ანტიდოპინგური განათლების მიმართულებით.
"საქართველოს რაგბის კავშირი ეხმაურება World Rugby-ს მიერ მიღებულ გადაწყვეტილებას, რომლის მიხედვითაც 2023 წლის საფრანგეთში გამართული მამაკაცთა რაგბის მსოფლიო ჩემპიონატის წინ საქართველოს 15-კაცა ნაკრებში ანტი-დოპინგური წესების დარღვევის რამდენიმე შემთხვევა გამოვლინდა. დარღვევების შედეგად, სხვადასხვა ვადით დისკვალიფიცირებული არიან ნაკრების ექვსი მოთამაშე და პერსონალის ერთი წევრი. აღნიშნულიდან გამომდინარე, World Rugby-მ არასათანადო ქცევის ბრალდება წარადგინა საქართველოს რაგბის კავშირის მიმართაც.
კავშირი დაეთანხმა მსოფლიო რაგბის მიერ მიღებულ გადაწყვეტილებას, რომლის მიხედვითაც, შესაბამის ჯარიმასთან ერთად მიიღო ვალდებულება, განახორციელოს რეფორმა ანტი-დოპინგური განათლების მიმართულებით.
პროცესის დაწყების პირველივე დღიდან, საქართველოს რაგბის კავშირი სრულად და გამჭვირვალედ თანამშრომლობს მსოფლიო რაგბისთან. ანტი-დოპინგური განათლების რეფორმის ფარგლებში უკვე მიმდინარეობს ინტენსიური მუშაობა, გატარებულია გამკაცრებული პრევენციული ღონისძიებები.
საქართველოს რაგბის კავშირი იღებს სრულ პასუხისმგებლობას, ქართულ რაგბში ანტიდოპინგური პროცესის გაუმჯობესებაზე და ყველაფერს აკეთებს იმისათვის, რომ რაგბი საქართველოში იყოს სუფთა, გამჭვირვალე და მსოფლიო რაგბის სტანდარტებთან სრულად შესაბამისი", - წერს ორგანიზაცია.