რას მოიცავს Black Hills-ისა და Google-ის $1.8 მილიარდიანი გარიგება?

ამერიკულმა ენერგეტიკულმა კომპანია Black Hills-მა ქალაქ შაიენში Google-ის მიერ დაანონსებული მონაცემთა ცენტრის ელექტროენერგიით უზრუნველსაყოფად ოფიციალური შეთანხმება გააფორმა.

Reuters-ის ცნობით, საწარმო ახალი საგენერაციო სიმძლავრეების შესაქმნელად 2027 წლიდან 2029 წლამდე პერიოდში კონკრეტულად ტექ-გიგანტისთვის $1.8 მილიარდის ინვესტიციას განახორციელებს.

პროექტის ფარგლებში Black Hills-ი ქალაქ შაიენში 564 მეგავატის ახალ საგენერაციო ინფრასტრუქტურას ააშენებს. ეს ობიექტი Google-ის მონაცემთა ცენტრისთვის საჭირო რესურსის მიწოდებას ეტაპობრივად, 2027 წლის ბოლოდან დაიწყებს. სისტემის პიკური დატვირთვის მიღწევას კომპანია 2030 წლისთვის ელოდება.

გაფორმებული შეთანხმება Google-ს მონაცემთა ცენტრის ელექტროენერგიით მომარაგების ხარჯების სრულად დაფარვას ავალდებულებს. შესაბამისად, ეს პირობა სხვა საყოფაცხოვრებო მომხმარებლებზე ფინანსური ხარჯების გადატანას სრულად გამორიცხავს.