რატომ აპირებს თეთრი სახლი იარაღის მწარმოებელ კომპანიებთან შეხვედრას?

ტრამპის ადმინისტრაცია ამერიკული თავდაცვის უმსხვილესი კომპანიების ხელმძღვანელებთან შეხვედრას მომდევნო კვირას გამართავს. არსებული ინფორმაციით, დისკუსია საბრძოლო მასალების მარაგების შევსებასა და იარაღის წარმოების დაჩქარებას დაეთმობა.

როგორც ირკვევა, მიმდინარე ომმა ირანთან და უკრაინისათვის გაწეულმა დახმარებამ ამერიკული არსენალი მნიშვნელოვნად შეამცირა, შესაბამისად, ტრამპის ადმინისტრაციას სურს, წამყვანი კომპანიები წარმოების გაზრდაზე დაითანხმოს.

თეთრი სახლის პრესსპიკერის, ანა კელის განცხადებით, ამერიკის შეერთებული შტატების სამხედრო ძალებს პრეზიდენტ ტრამპის სტრატეგიული მიზნების შესასრულებლად საკმარისი საბრძოლო მარაგი აქვთ, თუმცა სამომავლო რისკების გადასაზღვევად კიდევ მეტის მობილიზებაა საჭირო.

აღსანიშნავია, რომ პარალელურად მწარმოებლებთან მოლაპარაკებებს აქტიურად აგრძელებს პენტაგონი და მიმდინარე წელს მიღწეული შეთანხმებების დაჩქარებას გეგმავს. მხარეებს შორის უკვე გაფორმებული ჩარჩო-შეთანხმებები Lockheed Martin-ისგან PAC-3-ის რაკეტების წარმოების გასამმაგებასა და THAAD-ის სისტემების გამოშვების გაოთხმაგებას ითვალისწინებს. ამას გარდა, RTX-თან გაფორმებული ხელშეკრულებები მიზნად Tomahawk-ისა და AMRAAM-ის რაკეტების წარმოების გაზრდას ისახავს.

საყურადღებოა, რომ შესაძო შეხვედრასთან დაკავშირებით გავრცელებულ ინფორმაციაზე Lockheed Martin-ს, RTX-ს, Boeing-სა და L3Harris-ს ოფიციალური კომენტარი ჯერჯერობით არ გაუვრცელებიათ.

შეგახსენებთ, თავდაცვის სექტორის წარმომადგენლებთან თეთრ სახლში მსგავსი ფორმატის შეხვედრა მარტში უკვე გაიმართა. ღონისძიებას BAE Systems-ის, Lockheed Martin-ის, Northrop Grumman-ის, RTX-ის, Boeing-ის, Honeywell Aerospace-ისა და L3Harris-ის ხელმძღვანელები თავდაცვის მდივანთან, პიტ ჰეგსეთთან ერთად ესწრებოდნენ.