რატომ იზრდება ნავთობის ფასი?

დღევანდელ სავაჭრო სესიაზე ნავთობის ფასი საშუალოდ 4%-ით გაიზარდა და Brent-ის ღირებულებამ 94 დოლარს მიაღწია, ხოლო WTI-ის ფასი 91 დოლარი ფარგლებშია. თუკი მიმდინარე ფასებს გასული წლის ანალოგიურ პერიოდს შევადარებთ, დავინახავთ, რომ ნავთობი საშუალოდ 45%-ით არის გაძვირებული.

ენერგეტიკული რესურსის ბოლოდროინდელი გაძვირება აშშ-ირანის მოლაპარაკების პროცესის გაჭიანურებით არის განპირობებული. გასული კვირის მიწურულს, ბაზარზე იყო მოლოდინი, რომ სამშვიდობო შეთანხმება უახლოეს მომავალში გაფორმდებოდა, თუმცა დღეს ცნობილი გახდა, რომ მხარეებმა ერთმანეთს თავდაცვის არგუმენტით ცეცხლი გაუხსნეს. ამასთან, არსებობს სერიოზული ეჭვები ირანის ხელისუფლების ლეგიტიმურობასთან დაკავშირებით და დღემდე გაურკვეველია, თუ ვინ მართავს ქვეყანას რეალურად.

საერთო ჯამში, გაურკვევლობა, მოლაპარაკების გაჭიანურება და ჰორმუზის სრუტის პარალიზება ენერგეტიკულ ბაზარზე რისკებს აჩენს, რაც ნავთობისა და გაზის გაძვირებას იწვევს. ბუნებრივი აირის შემთხვევაში, დღეს ზრდის მაჩვენებელი 5%-ია, ხოლო ერთწლიან პერიოდში მატება საშუალოდ 40%-ია.

ექსპერტების შეფასებით, თუ ჰორმუზის სრუტე ივლისამდე არ გაიხსნება, მაშინ წლის განმავლობაში ნავთობის არსებითი გაიაფება მოსალოდნელი ვეღარ იქნება.