რატომ შეუჩერა რუსეთმა სომხეთს ბუნებრივი აირის მიწოდება?
რუსეთის ფედერაცია სომხეთის რესპუბლიკას ბუნებრივი აირის მიწოდებას 15-დან 25 სექტემბრამდე პერიოდში შეუჩერებს. როგორც ირკვევა, ექსპორტის დროებითი შეჩერება რუსეთის ტერიტორიაზე მდებარე „ჩრდილოეთ კავკასია-ამიერკავკასიის“ მაგისტრალურ გაზსადენზე დაგეგმილ პროფილაქტიკურ და სარემონტო სამუშაოებს უკავშირდება.
ენერგოკომპანია Gazprom-ის სომხურმა წარმომადგენლობამ ოფიციალურად დაადასტურა, რომ ინფრასტრუქტურული პროექტი მიზნად მილსადენის უსაფრთხო და საიმედო ფუნქციონირებას ისახავს.
გამოქვეყნებულ ტექსტში კომპანიის ხელმძღვანელობამ აღნიშნა, რომ სარემონტო პროცესი ქვეყნის ენერგომომარაგებაზე უარყოფით გავლენას არ იქონიებს. ოფიციალური განმარტებით, სომხეთის მოსახლეობა ბუნებრივ აირს შიდა მარაგებისა და ირანიდან იმპორტირებული დამატებითი მოცულობების მეშვეობით, ყოველგვარი შეზღუდვის გარეშე მიიღებს. შესაბამისად, გაზგამანაწილებელი ქსელი ამ 11 დღის განმავლობაში შეუფერხებელ მუშაობას სრული დატვირთვით გააგრძელებს.
ცნობისთვის, „ჩრდილოეთ კავკასია-ამიერკავკასიის“ მაგისტრალური გაზსადენი სომხეთისთვის რუსული ბუნებრივი აირის მიწოდების მთავარი მარშრუტია. თავად ერევანი საჭირო საწვავის უდიდეს ნაწილს სწორედ მოსკოვისგან ყიდულობს, ირანულ გაზს კი ელექტროენერგიის გაცვლის პროგრამის ფარგლებში იღებს.
BM.GE
წყარო: bm.ge