რევაზ სოხაძე საქართველოში ინდოეთის პირველ რეზიდენტ ელჩს შეხვდა

საქართველოს ინფრასტრუქტურის მინისტრმა რევაზ სოხაძემ საქართველოში ინდოეთის რესპუბლიკის საგანგებო და სრულუფლებიან ელჩთან, ამიტ კუმარ მიშრასთან, გაცნობითი ხასიათის შეხვედრა გამართა.

სამინისტროს ინფორმაციით, მინისტრმა ელჩს საქართველოში ინდოეთის პირველი რეზიდენტი ელჩის სტატუსით დანიშვნა მიულოცა და დადებითად შეაფასა თბილისში ინდოეთის რესპუბლიკის საელჩოს გახსნა, რაც მისი შეფასებით, ორ ქვეყანას შორის თანამშრომლობის კიდევ უფრო გაღრმავებას შეუწყობს ხელს.

"შეხვედრის ფარგლებში რევაზ სოხაძემ ელჩს გააცნო სამინისტროს საქმიანობის ძირითადი მიმართულებები, ასევე მიმდინარე და დაგეგმილი სტრატეგიული ინფრასტრუქტურული პროექტები.

მხარეებმა განიხილეს საქართველოსა და ინდოეთს შორის თანამშრომლობის განვითარების პერსპექტივები. ამიტ კუმარ მიშრამ აღნიშნა, რომ საქართველოსთან თანამშრომლობა სხვადასხვა მიმართულებით არაერთი ინდური კომპანიისთვის წარმოადგენს ინტერესის საგანს. მან ასევე გამოხატა დაინტერესება საქართველოს სატრანზიტო და ლოგისტიკური პოტენციალით.

ინფრასტრუქტურის სამინისტროში გამართულ შეხვედრას მინისტრის მოადგილე მზია გიორგობიანი და მინისტრის აპარატის უფროსი სოფიო მამალაძე ესწრებოდნენ", - წერია გავრცელებულ პრესრელიზში.