რეზერვები რეკორდულია, ლარი სტაბილურობას ინარჩუნებს... მადლობა ეკონომიკურ გუნდს, სებ-ს - კობახიძე

"ოცნების" პრემიერ-მინისტრი ირაკლი კობახიძე ამბობს, რომ რეზერვები რეკორდული, ლარის კურსი კი სტაბილურია, რისთვისაც ეროვნულ ბანკს და მთავრობის ეკონომიკურ გუნდს უნდა გადავუხადოთ მადლობა. მან ამის შესახებ მთავრობის სხდომაზე განაცხადა.

როგორც კობახიძემ აღნიშნა, დადებითი ტენდენციების ფონზე საქართველოს ეროვნულმა ბანკმა აპრილში სავალუტო რეზერვები 154,2 მილიონი დოლარით შეავსო.

„შესაბამისად, რეზერვებმა მიაღწია რეკორდულ ნიშნულს 6,47 მილიარდ დოლარს. ლარის კურსი ინარჩუნებს სტაბილურობას. ამ ყველაფრისთვის მადლობა უნდა გადავუხადოთ მთლიანად ეკონომიკურ გუნდს, ჩვენი მთავრობის ეკონომიკურ გუნდს, ეროვნულ ბანკს, ეროვნული ბანკის პრეზიდენტს. მომავალშიც აქტიურად ვიმუშავებთ ყველა მიმართულებით იმისათვის, რომ შევინარჩუნოთ ეკონომიკური ზრდის მაღალი ტემპი, ფისკალური კონსოლიდაციის მაღალი მაჩვენებლები, შევავსოთ დამატებით ჩვენი სავალუტო რეზერვები, ამისათვის გაკეთდება მაქსიმუმი“, - განაცხადა პრემიერ-მინისტრმა.

ცნობისთვის, საქართველოს ეროვნულმა ბანკმა სავალუტო რეზერვების ამსახველი სტატისტიკა გუშინ გამოაქვეყნა, საიდანაც ცნობილი ხდება რომ გასული თვის განმავლობაში რეზერვები მარტთან შედარებით 154 მილიონი დოლარით, 6.47 მილიარდ დოლარამდე გაიზარდა. შესაბამისად, სავარაუდოდ სებ-მა განაგრძო სავალუტო რეზერვების შესყიდვის პოლიტიკა, თუმცა აღნიშნულის შესახებ დეტალური სტატისტიკა ცნობილი გახდება 27 მაისს, ხოლო იანვარ-მარტის სტატისტიკის თანახმად, სებ-ის წმინდა შესყიდვები 499.7 მილიონ დოლარს შეადგენდა. უშუალოდ მარტში კი სებ-მა 16 მილიონი დოლარი გაყიდა, რაც აღნიშნულ პერიოდში ლარის გაცვლითი კურსის მერყეობას უკავშირდებოდა.