Rheinmetall-მა FV-014 კამიკაძე დრონების მასობრივი წარმოება დაიწყო

თავდაცვითი ინდუსტრიის გერმანულმა გიგანტმა, Rheinmetall-მა FV-014 ტიპის კამიკაძე დრონების მასობრივი წარმოება დაიწყო. კომპანიის აღმასრულებელმა დირექტორმა, არმინ პაპერგერმა აღნიშნული გადაწყვეტილება აქციონერთა ონლაინ კონფერენციაზე გააჟღერა.

როგორც ირკვევა, ახალი ტიპის შეიარაღების სერიული წარმოება ქალაქ ნოისში მდებარე ქარხანაში განხორციელდება. როგორც ირკვევა, ამისთვის Rheinmetall-მა ავტონაწილების ყოფილი საწარმო გადააიარაღა.

მნიშვნელოვანია ითქვას, რომ FV-014 მოდელი სულ რამდენიმე თვეში, რეკორდულ დროში შეიქმნა. ის 100 კილომეტრამდე რადიუსში მოქმედებს და ჰაერში 70 წუთის განმავლობაში დარჩენა შეუძლია. დრონი 4-კილოგრამიანი საბრძოლო მასალით არის აღჭურვილი. ამასთან, თავად აპარატს გერმანიაში აწყობენ, ხოლო მის საბრძოლო ნაწილს იტალიაში აწარმოებენ. აღნიშნული მოდელი ერთჯერადი გამოყენების არის და მიზნად სახმელეთო სამიზნეებზე ზუსტი დარტყმების განხორციელებას ისახავს. FV-014 სპეციალური კონტეინერიდან ეშვება და სამიზნეს დამოუკიდებლად ეძებს. თუ დადგენილ დროში ობიექტის იდენტიფიცირება ვერ მოხდა, ის მართვად დაშვებას ასრულებს.

რაც შეეხება ფინანსურ მხარეს, ბუნდესვერმა უკვე გააფორმა €300 მილიონის ($324 მლნ.) ღირებულების კონტრაქტი. აღსანიშნავია, რომ ჩარჩო ხელშეკრულება სამომავლოდ შეკვეთების მოცულობის გაზრდის შესაძლებლობასაც ითვალისწინებს. საყურადღებოა, რომ გერმანული გიგანტი პირველი პარტიის დამკვეთისთვის მიწოდება მომავალი წლიდან შეძლებს.

რაც შეეხება, Rheinmetall-ის სხვა გეგმებს, ის ევროპაში ფრთოსანი რაკეტების წარმოების დაწყებასაც აპირებს. ცნობილი გახდა ისიც, რომ გერმანული კომპანია MSC-სთან პარტნიორობით რუმინეთში მდებარე მანგალიას გემთმშენებელი ქარხნის შეძენით არის დაინტერესებული. ამას გარდა, კომპანია Deutsche Telekom-თან ერთად კიბერშეტევებისა და დრონებისგან დამცავ ერთობლივ სისტემებზე იმუშავებს.