რკინიგზის 153-მილიონიანი მოგება რეფორმების და განახლების პირველადი შედეგია - თამარ იოსელიანი
„საქართველოს რკინიგზაში მიმდინარე რეფორმებისა და განახლების პირველადი შედეგები უკვე თვალსაჩინოა, 2025 წელს კომპანიის წმინდა მოგება დაახლოებით 2-ჯერ გაიზარდა, რაც ეფექტიანი მართვისა და სწორი განვითარების შედეგია“, - აცხადებს ეკონომიკისა და მდგრადი განვითარების მინისტრის მოადგილე თამარ იოსელიანი.
თამარ იოსელიანის განმარტებით, საქართველოს რკინიგზა მომავალ განვითარებაზე არის ორიენტირებული, დაგეგმილია 50 ახალი ლოკომოტივისა და 1 500 ვაგონის შეძენა, რისთვისაც 1 მილიარდ ლარზე მეტი ინვესტიცია განხორციელდება.
„ეს გაზრდის ქვეყნის სატრანსპორტო შესაძლებლობებს და კიდევ უფრო გააძლიერებს საქართველოს როლს საერთაშორისო სატრანზიტო მარშრუტებში“, - აღნიშნა თამარ იოსელიანმა.
საქართველოს რკინიგზის წლიური ანგარიშის თანახმად, 2025 წელს კომპანიის წმინდა მოგება მნიშვნელოვნად გაიზარდა და 152.7 მლნ ლარი შეადგინა, მაშინ როცა 2024 წელს ეს მაჩვენებელი 68.2 მლნ ლარი იყო.
რკინიგზის ფინანსური შედეგები ცნობილია:
2025 წელს საქართველოს რკინიგზის შემოსავალი 612.4 მილიონ ლარს შეადგენდა, რაც 2024 წელთან შედარებით 5,5%-ით ნაკლებია. ანგარიშის თანახმად, კომპანიის შემოსავლის კლება სატვირთო გადაზიდვებიდან მიღებული შემოსავლების შემცირებამ განაპირობა. ეს კი თავის მხრივ 2025 წელს რკინიგზის მიერ გატარებული ტვირთების მოცულობას უკავშირდება, რაც 13.3 მილიონ ტონას შეადგენდა და 2024 წელთან შედარებით 3%-ით ნაკლები იყო.
საქართველოს რკინიგზის თანახმად, შემოსავლის შემცირების მიუხედავად, ორჯერ გაიზარდა კომპანიის მოგება - და ის 152.7 მლნ ლარს შეადგენდა (2024 წლის წმინდა მოგება 68.2 მლნ ლარი). ფინანსური ანგარიშის თანახმად, მოგების გაუმჯობესების ძირითადი ფაქტორი არის კურსთაშორისი სხვაობიდან მიღებული მოგება. საქმე ისაა, რომ საქართველოს რკინიგზას გააჩნია $500-მილიონიანი ევროობლიგაცია და რკინიგზის ფინანსურ დანახარჯებზე ამ ვალდებულების მოცულობის ცვლილება, რაც ლარში არის გამოხატული, მნიშვნელოვან გავლენას ახდენს. 2025 წელს ლარს დოლართან გამყარების ტენდენცია ჰქონდა, რის გამოც, საქართველოს რკინიგზამ 56.4 მილიონი ლარის საკურსო მოგება მიიღო, 2024 წელს კი ლარის გაუფასურებიდან გამომდინარე ამ კომპონენტში საქართველოს რკინიგზას 55.7 მილიონი ლარის ზარალი ჰქონდა.