Rocket Lab-მა Iridium-ი 8 მილიარდ დოლარად შეიძინა

ამერიკულმა საავიაციო-კოსმოსურმა კომპანია Rocket Lab-მა სატელიტური კომუნიკაციების სერვისის მომწოდებელი Iridium-ი $8 მილიარდად შეიძინა.

როგორც მედია წერს, ამ გარიგებით კომერციული კოსმოსური ინდუსტრიის ისტორიაში ერთ-ერთი ყველაზე მასშტაბური კონსოლიდაცია შედგა.

ოფიციალური შეთანხმების მიხედვით, Iridium-ის ინვესტორები თითოეულ აქციაში 27 დოლარს, ასევე Rocket Lab-ის ფასიან ქაღალდებს მიიღებენ. შესაბამისად, Iridium-ის აქციონერები თითო აქციის სანაცვლოდ ჯამურად 54 დოლარს მიიღებენ, რაც საბაზრო ღირებულებას 24.1%-ით აღემატება.

აღსანიშნავია, რომ ახალი შენაძენი Rocket Lab-ის სარაკეტო-გამშვებ სისტემებსა და Iridium-ის გლობალურ სატელიტურ ქსელს გააერთიანებს და საფუძველს დაუდებს ილონ მასკის კომპანია Starlink-ის შესაძლო კონკურენტის ჩამოყალიბებას.

Rocket Lab-ის მენეჯმენტის განმარტებით, ახალი გარიგება კომპანიას საშუალებას მისცემს, წარმოების დამოუკიდებლად დაწყების და ამაზე კაპიტალური დანახარჯის გაღების გარეშე მოხერხდეს კონკურენტული პროდუქტის შექმნა, რომელიც მომხმარებლისთვის სატელიტურ ინტერნეტს გაცილებით ხელმისაწვდომს გახდის.

აღსანიშნი ფაქტია, რომ გარიგების ნაღდი ფულით დასაფინანსებლად Rocket Lab-მა Deutsche Bank-ისა და Wells Fargo-სგან 3.6 მილიარდი დოლარის სესხი აიღო.

გადაწყვეტილების გამოცხადების ფონზე, Rocket Lab-ის აქციების ფასი 16%-ით გაიზარდა. ამჟამად ერთი აქცია $99.48-ად ივაჭრება, თავად კომპანიის კაპიტალიზაცია კი $58.84 მილიარდს შეადგენს.

შეგახსენებთ, Rocket Lab-ი საჰაერო-კოსმოსურ სფეროში მომუშავე ამერიკული კომპანიაა. დასახელებული ორგანიზაცია კომერციულ ბაზარზე მცირე ზომის თანამგზავრებსა და სარაკეტო სისტემებს ქმნის.