"როდესაც მრავალი ქვეყანა საწვავის დეფიციტს განიცდის, სომხეთს საიმედო წყარო აქვს და ეს წყარო აზერბაიჯანია" - ალიევი

აზერბაიჯანის პრეზიდენტმა, ილჰამ ალიევმა ქალაქ შუშაში მიმდინარე მეოთხე გლობალურ მედია ფორუმზე გამოსვლისას განაცხადა, რომ თანამედროვე გამოწვევების პირობებში სომხეთს საწვავის დეფიციტის პრობლემა არ აქვს, რადგან მას დახმარებას აზერბაიჯანი უწევს.

"თავად აზერბაიჯანმა უკვე დაიწყო ნავთობპროდუქტების ექსპორტი სომხეთში. თუ არ ვცდები, დღემდე 10,000 ტონაზე მეტი ნავთობპროდუქტია მიწოდებული. განსაკუთრებით დღევანდელ პირობებში, როდესაც მრავალი ქვეყანა საწვავის დეფიციტს განიცდის, სომხეთს საწვავის საიმედო წყარო აქვს და ეს წყარო აზერბაიჯანია. წინააღმდეგ შემთხვევაში, სომხეთი, ალბათ, იძულებული იქნებოდა დღეს ბენზინი და დიზელი მსოფლიოს სხვადასხვა კუთხეში ეძებნა“ - განაცხადა ალიევმა

სიტყვით გამოსვლისას აზერბაიჯანის ლიდერმა აღნიშნა ისიც, რომ ქვეყანამ სომხეთის მიმართ დაწესებული ყველა სატრანზიტო შეზღუდვა ცალმხრივად უკვე გააუქმა. სახელმწიფოს მეთაურის განმარტებით, სწორედ ამ ნაბიჯის დამსახურებით, აზერბაიჯანის ტერიტორიის გავლით სომხეთში რუსეთიდან, ყაზახეთიდან და სხვა ქვეყნებიდან უკვე 40,000 ტონაზე მეტი სხვადასხვა დანიშნულების ტვირთი გადაიზიდა.