როგორ დაიბეგრება მეწარმე ფიზიკური პირის მიერ უძრავი ქონების რეალიზაცია - სამინისტროს გადაწყვეტილება

ფინანსთა სამინისტრომ მეწარმე ფიზიკური პირის მიერ უძრავი ქონების რეალიზაციიდან მიღებული შემოსავლის დაბეგვრის საკითხებზე საჯარო გადაწყვეტილება მიიღო.

სამინისტრო განმარტავს, რომ მეწარმე ფიზიკური პირის მიერ სამეწარმეო საქმიანობის ფარგლებში აქტივის მიწოდება, არ განიხილება საცხოვრებელი ბინის/სახლის რეალიზაციად.

“მიუხედავად ობიექტის ტიპისა, მეწარმე ფიზიკური პირის მიერ სამეწარმეო საქმიანობის ფარგლებში აქტივის მიწოდება, არ განიხილება საცხოვრებელი ბინის/სახლის რეალიზაციად სსკ-ის 81-ე მუხლის მე-3 ნაწილისა და 82-ე მუხლის პირველი ნაწილის „ვ.ა“ ქვეპუნქტის მიზნებისთვის, თუ ასეთი მიწოდება ხორციელდება სისტემატური და ორგანიზებული საქმიანობის ფარგლებში. (მათ შორის, დეველოპერული საქმიანობა, უძრავი ქონებით ვაჭრობა, იპოთეკური მოთხოვნების უზრუნველყოფის მიზნით აქტივების რეალიზაცია და სხვა ანალოგიური საქმიანობა). ამასთანავე, საცხოვრებელი ბინის/სახლის ფლობა, მისი გაქირავება ან შემდგომი გასხვისება, არ მიიჩნევა სამეწარმეო საქმიანობად, თუ ასეთი ოპერაციები არ ატარებს სისტემატურ და ორგანიზებულ ხასიათს”, - ნათქვამია გადაწყვეტილებაში.

როგორც “კრესტონ ჯორჯიას” მმართველმა პარტნიორმა “საქმის კურსის” ეთერში განმარტა, ეს გადაწყვეტილება იმას ნიშნავს, რომ მსგავსი სამეწარმეო საქმიანობის ფარგლებში მეწარმე ფიზიკური პირები ნაცვლად, 5%-იანი განაკვეთისა, 20%-იანი განაკვეთით დაიბეგრებიან.

დავით პაპიაშვილის შეფასებით, აღნიშნული საკითხი საგადასახადო კანონმდებლობაში მართლაც ორაზროვანია. თუმცა მისი თქმით, უმჯობესია, რომ ეს კანონში გაიწეროს და არა სამინისტროს საჯარო გადაწყვეტილებაში.

“კრესტონ ჯორჯიას” მმართველი პარტნიორის შეფასებითვე, ერთ-ერთი გამოწვევა საგადასახადო დაბეგვრის საკითხებთან მიმართებაში გადასახადის გადამხდელების ნაკლებ ინფორმირებულობაა.

დავით პაპიაშვილი ვარაუდობს, რომ საჯარო გადაწყვეტილების გამოცემის შემდეგ მოსალოდნელია ფინანსთა სამინისტროს მიერ ამ მიმართულებით ადმინისტრირებას გამკაცრება.

“მნიშვნელოვანი დასკვნა, რაც კეთდება ამ საჯარო გადაწყვეტილებიდან არის ის, რომ სამეწარმეო საქმიანობის ფარგლებში [ფიზიკური პირის მიერ] გაყიდული უძრავი ქონება, თუნდაც ბინა, ფინანსთა სამინისტროს მიერ არ არის დაკვალიფიცირებული როგორც საცხოვრებელი ბინა. შესაბამისად, მაგალითად ადამიანები, რომლებიც ყიდულობენ ბინას იმისათვის, რომ გაარემონტონ და გაყიდონ, მათზე 5%-იანი შეღავათი არ გავრცელდება და ეს დაიბეგრება 20%-ით. ეს იმ შემთხვევაში, თუ [შეძენიდან] 2 წელზე ადრე მოხდა გაყიდვა, ან 2 წლის შემდეგ მოხდა გაყიდვა და ბოლო 2 წელი [ბინა] გაქირავებული იყო. თუმცა ჩემი აზრით, ეს პირდაპირ არ გამომდინარეობს კანონმდებლობიდან. ეს საკითხი ყოველთვის ორაზროვანი იყო და ამაზე არაერთხელ გვისაუბრია, რომ უნდა დაზუსტებულიყო. სამწუხაროდ, ფინანსთა სამინისტრომ გადაწყვიტა ისე, რომ ამ ყველაფერს როგორც სხვა ქონებას, ისე განიხილავენ.

ამ საკითხზე ცნობიერების დონე არის ძალიან დაბალი საზოგადოებაში და არა თუ ჩვენმა მოქალაქეებმა, შეიძლება ითქვას, რომ შემოსავლების სამსახურში და ფინანსთა სამინისტროშიც ბოლო მომენტამდე არ იყო ამაზე საერთო პოზიცია. მე მაინც ვემხრობი იმას, რომ ასეთი ორაზროვნება უნდა გადაწყდეს საკანონმდებლო დონეზე და არა ფინანსთა სამინისტროს მიდგომით.

გამომდინარე იქიდან, რომ საჯარო გადაწყვეტილება გამოიცა, ეს მიანიშნებს იმაზე, რომ კონტროლი ამ მიმართულებით გაძლიერდება. მათ შორის, ყურადღება მიექცევა იმ გარემოებას, 5%-ს გადახდა ეკუთვნის გადასახადის გადამხდელს თუ 20%-ის. ამ დეტალებს ყურადღება მიექცევა და, რა თქმა უნდა, ვერ გამოვრიცხავთ რიგითი მოქალაქეების დაჯარიმებასაც ამ მიმართულებით”, - განაცხადა დავით პაპიაშვილმა.

როგორ დაიბეგრება აპარტამენტების ფართების რეალიზება - სამინისტროს გადაწყვეტილება