როგორ იცვლებოდა აშშ-ის ბიუჯეტის დეფიციტი პრეზიდენტების მიხედვით?

ამერიკის შეერთებული შტატების პოლიტიკური ისტორია მჭიდროდ არის გადაჯაჭვული ქვეყნის ეკონომიკურ გამოწვევებთან, სადაც ფედერალური ბიუჯეტის დეფიციტის საკითხი ყოველთვის მთავარ სადისკუსიო თემას წარმოადგენს.

უახლესი ისტორიის მანძილზე, სხვადასხვა ადმინისტრაციის პირობებში, ბიუჯეტის დეფიციტის მაჩვენებლები მნიშვნელოვნად იცვლებოდა და პარტიული მმართველობის მიხედვით განსხვავებულ დინამიკას აჩვენებდა.

ხელმისაწვდომი მონაცემების მიხედვით, რესპუბლიკელი პრეზიდენტების მმართველობის პერიოდში ფედერალური დეფიციტის ზრდის ტენდენცია ფიქსირდება. კერძოდ, რონალდ რეიგანის პრეზიდენტობისას დეფიციტი 74 მილიარდი დოლარით გაიზარდა, ხოლო მისი მემკვიდრის, ჯორჯ ბუშ უფროსის პირობებში ამ მაჩვენებელმა 102 მილიარდი დოლარით მოიმატა.

ზრდის დინამიკა კიდევ უფრო მასშტაბური გახდა ჯორჯ ბუშ უმცროსის ადმინისტრაციის პირობებში, როდესაც დეფიციტმა 1.5 ტრილიონი დოლარით მოიმატა. ეს ტენდენცია შენარჩუნდა დონალდ ტრამპის პრეზიდენტობისასაც, რა დროსაც დეფიციტის თავდაპირველი ზრდა 2 ტრილიონ დოლარს შეადგენდა, შემდგომში კი მზარდმა მაჩვენებელმა 4 ტრილიონ დოლარს მიაღწია.

ამის საპირისპიროდ, დემოკრატი პრეზიდენტების მმართველობის წლებში ფიქსირდება ფედერალური დეფიციტის შემცირება. ბილ კლინტონის ადმინისტრაციის პირობებში ქვეყნის ბიუჯეტის დეფიციტი 383 მილიარდი დოლარით შემცირდა. მსგავსი კლება დაფიქსირდა ბარაკ ობამას პრეზიდენტობის დროსაც, როდესაც მაჩვენებელმა 825 მილიარდი დოლარით დაიკლო. უახლესი სტატისტიკით კი, ჯო ბაიდენის ადმინისტრაციის პირობებში ფედერალური დეფიციტი 942 მილიარდი დოლარით არის შემცირებული.

პრეზიდენტების ეკონომიკური მემკვიდრეობის და ბიუჯეტის დეფიციტის მიუხედავად, ერთი რამ უცვლელია - აშშ-ის მთავრობა ყოველთვის უფრო მეტს ხარჯავს, ვიდრე შემოსავალს იღებს, რაც საბიუჯეტო ვალის ზრდას იწვევს. ამჟამად, აშშ-ის ვალის მოცულობა რეკორდულ $40.6 ტრილიონს აჭარბებს, რომელიც ყოველდღიურად იზრდება.