როგორი კვარტალური შედეგები აქვს Hugo Boss-ს?

გერმანული მოდის სახლ Hugo Boss-ის კვარტალურმა საოპერაციო მოგებამ ანალიტიკოსების პროგნოზს გადააჭარბა. კომპანიამ პირველ კვარტალში 35 მილიონი ევროს ($38 მლნ.) მოგება მიიღო. აღსანიშნავია, რომ ეს მაჩვენებელი პროგნოზირებულ 30 მილიონ ევროს მნიშვნელოვნად აღემატება.

თუმცა, მკვეთრად ჩამორჩება გასული წლის ანალოგიურ პერიოდში დაფიქსირებულ 61 მილიონ ევროს ($66 მლნ.). ბრენდის მთლიანმა შემოსავალმა ბოლო 3 თვეში 905 მილიონი ევრო ($978 მლნ.) შეადგინა.

აღსანიშნავია, რომ რთული გეოპოლიტიკური ვითარების მიუხედავად, კომპანიამ ფინანსური მდგრადობის შენარჩუნება მაინც შეძლო. როგორც ცნობილია, ახლო აღმოსავლეთში მიმდინარე კონფლიქტმა დასავლური მოდის სახლები რთულ ვითარებაში ჩააყენა, რადგან გასაღების ძირითადი ბაზრები ტურისტების დიდმა ნაწილმა, ასევე ექსპატებმა დატოვეს. როგორც გამოქვეყნებული დოკუმენტებით ირკვევა, მარტიდან რეგიონში მდებარე მაღაზიებში მომხმარებელთა ნაკადი საგრძნობლად შემცირდა.

აღმასრულებელი დირექტორის, დანიელ გრიდერის თქმით, ბრენდი წლის დასაწყისში დასახული სტრატეგიის შესრულებაზე კვლავ იქნება ფოკუსირებული და ომის მიუხედავად გეგმებს არ შეცვლის. ამ მხრივ, გარდამტეხი როლი ექნება Hugo Boss-ი მიერ პროდუქციის ხაზის ოპტიმიზაციასა და სადისტრიბუციო ქსელის გადახედვას. როგორც ირკვევა, კომპანია მარკეტინგული ინვესტიციების მეშვეობით პოპულარობის გაზრდასა და ხარჯების შეზღუდვას აპირებს.

ცნობისთვის, Hugo Boss-ი არის გერმანული მოდის სახლი, რომელიც მსოფლიო ბაზარზე პრემიუმ კლასის ტანსაცმელსა და აქსესუარებს ყიდის.