რომელ ობლიგაციებშია განთავსებული საქართველოს საპენსიო ფონდის აქტივები

2026 წლის აგვისტოს მდგომარეობით, საქართველოს საპენსიო ფონდის ზომამ 9.7 მილიარდ ლარს გადააჭარბა - ამის შესახებ ინფორმაციას თავად ფონდი აქვეყნებს. ანგარიშის თანახმად, ეს თანხა წარმოადგენს 1,568,129 მოქალაქის საპენსიო დანაზოგს, შესაბამისად სისტემის ერთი მონაწილის საშუალო დანაზოგი 6,204 ლარს შეადგენს.

ბოლო ერთ წელში პორტფელის ზომა 2.5 მილიარდი ლარით გაიზარდა. საპენსიო აქტივებიდან 440 მილიონი ლარი და 26 მილიონი დოლარი ფონდს კორპორატიულ და სუვერენულ ობლიგაციებში აქვს განთავსებული.

საპენსიო პორტფელში შემდეგი ემიტენტების ობლიგაციები შედის ჯამური მოცულობა EBRD 150 მლნ ლარი GHG JSC 69.48 მლნ ლარი IFC 53.36 მლნ ლარი ADB 41 მლნ ლარი AIIB 40 მლნ ლარი ნიკორა ტრეიდი 23.95 მლნ ლარი თიბისი ლიზინგი 23 მლნ ლარი ნიკორა 12.85 მლნ ლარი სელფი მობაილი 13 მლნ ლარი მიკრობანკი ემბისი 10 მლნ ლარი თეგეტა მოტორსი 3 მლნ ლარი საქართველოს კაპიტალი $1.918 მლნ სილქ როუდ ჯგუფი $4 მლნ საქართველოს სუვერენული ევროობლიგაცია $20 მლნ

საპენსიო პორტფელში არსებული ობლიგაციები:

ყველაზე დიდი ლარში დენომინირებული პოზიცია ევროპის რეკონსტრუქციისა და განვითარების ბანკის (EBRD) ობლიგაციას უკავია — 150 მილიონი ლარი. ეს არის კერძო განთავსების ფორმატში გამოშვებული ფასიანი ქაღალდი, რომლის დაფარვის ვადა 2029 წლის ოქტომბერშია.

შემდეგ მოდის GHG JSC-ის ობლიგაციები, რომლებშიც სამივე პორტფელის ჯამური პოზიცია 69.48 მილიონ ლარს შეადგენს. ობლიგაციის კუპონი TIBR 6M+3.75%-ით არის განსაზღვრული, დაფარვის ვადა კი 2030 წლის სექტემბერია.

საერთაშორისო საფინანსო ინსტიტუტების ფასიან ქაღალდებს შორის საპენსიო ფონდის მნიშვნელოვანი პოზიციები აქვს IFC-ის, ADB-ისა და AIIB-ის ობლიგაციებში. მათი ჯამური მოცულობა, შესაბამისად, 53.36 მილიონ, 41 მილიონ და 40 მილიონ ლარს შეადგენს. აღნიშნული ფასიანი ქაღალდების უმეტესობა 2030 წლის განმავლობაში იფარება.

ადგილობრივ კორპორაციულ ობლიგაციებს შორის ერთ-ერთი ყველაზე დიდი პოზიცია ნიკორა ტრეიდის ფასიან ქაღალდებზე მოდის — სამივე პორტფელის გაერთიანებით 23.95 მილიონი ლარი. კომპანიის ობლიგაციები ორ ტრანშად არის წარმოდგენილი, დაფარვის ვადებით 2029 წლის ოქტომბერი და 2030 წლის ივლისი.

თიბისი ლიზინგის ობლიგაციებში ფონდის ჯამური პოზიცია 23 მილიონ ლარს შეადგენს. ობლიგაციის კუპონი TIBR 3M+3.00%-ით არის განსაზღვრული, დაფარვის ვადა კი 2031 წლის მარტია.

ნიკორას ობლიგაციებში ფონდის სამივე პორტფელის ჯამური პოზიცია 12.85 მილიონი ლარია, ხოლო სელფი მობაილის ობლიგაციებში — 13 მილიონი ლარი. სელფი მობაილის ფასიანი ქაღალდის დაფარვის ვადა 2026 წლის დეკემბერია.

მიკრობანკი ემბისის ობლიგაციებში ფონდის ჯამური პოზიცია 10 მილიონ ლარს შეადგენს. ამ ფასიანი ქაღალდების დაფარვის ვადები 2027 წლის აპრილიდან ოქტომბრამდე პერიოდზეა განაწილებული.

თეგეტა მოტორსის ობლიგაციებში სამივე პორტფელის გაერთიანებული პოზიცია 3 მილიონი ლარია. ობლიგაციის კუპონი 13.5%-ს შეადგენს, დაფარვის ვადა კი 2026 წლის აგვისტოა.

უცხოურ ვალუტაში დენომინირებულ ფასიან ქაღალდებს შორის საპენსიო ფონდის პორტფელებში წარმოდგენილია საქართველოს სუვერენული ევროობლიგაცია — $20 მილიონი ნომინალური ღირებულებით. ობლიგაციას 5.125%-იანი კუპონი აქვს და მისი დაფარვის ვადა 2031 წლის იანვარია.

სილქ როუდ ჯგუფის ობლიგაციებში სამივე პორტფელის ჯამური პოზიცია $4 მილიონს შეადგენს. ფასიან ქაღალდს 7.5%-იანი კუპონი აქვს, მითითებული შემოსავლიანობა კი 7.59%-ია. დაფარვის ვადა 2030 წლის სექტემბერია.

საქართველოს კაპიტალის ობლიგაციებში ფონდის ჯამური პოზიცია $1.918 მილიონია. ფასიან ქაღალდს 8.5%-იანი კუპონი აქვს და მისი დაფარვის ვადა 2028 წლის აგვისტოშია.

ცალკე კატეგორიას წარმოადგენს საქართველოს სახელმწიფო სახაზინო ობლიგაციები, რომელთა ჯამური მოცულობა ფონდის მიერ გამოქვეყნებულ შეჯამებულ ანგარიშში კონკრეტული ემისიების მიხედვით ცალკე არ არის წარმოდგენილი. კონსერვატიულ პორტფელში სახაზინო ობლიგაციების წილი 18.7%-ს, დაბალანსებულში 5.4%-ს, ხოლო დინამიკურ პორტფელში 5%-ს შეადგენს.