რომელ თავშესაფრებში გადაიყვანენ რეგიონებიდან უპატრონო ძაღლებს - განკარგულება
საქართველოს მთავრობამ „ძაღლების ჰიპერპოპულაციის მართვის 2026 წლის პროგრამაში“ ცვლილებები შეიტანა. ირაკლი კობახიძის მიერ ხელმოწერილი განკარგულება განსაზღვრავს, თუ რამდენი ცხოველის სტერილიზაცია-ვაქცინაცია იგეგმება ქვეყნის მასშტაბით და როგორ გადანაწილდებიან ისინი მუნიციპალურ თავშესაფრებში.
გთავაზობთ მთავარ დეტალებს სამთავრობო დოკუმენტიდან:
ახალი განკარგულების თანახმად, მთელი ქვეყნის მასშტაბით გარდა თბილისისა და აჭარის ავტონომიური რესპუბლიკისა იდენტიფიკაცია-რეგისტრაცია, ცოფის საწინააღმდეგო ვაქცინაცია, კასტრაცია/სტერილიზაცია და საჭიროების შემთხვევაში, ტესტირება (ლეიშმანიოზსა და ჭირზე) ჩაუტარდება, სავარაუდოდ, 36 116 უპატრონო ან მიკედლებულ ძაღლს.
პროგრამა ორ ძირითად მიდგომას ითვალისწინებს:
• თუ ძაღლს არ აქვს საყურე ნიშანი: მას სააგენტო დაიჭერს და გადაიყვანს მუნიციპალურ თავშესაფრებში, სადაც ჩაუტარდება ყველა საჭირო პროცედურა, რის შემდეგაც მას ისევ იმავე ლოკაციაზე დააბრუნებენ, სადაც თავდაპირველად დაიჭირეს. • თუ ძაღლს უკვე აქვს საყურე ნიშანი: სააგენტო მის ცოფის საწინააღმდეგო ვაქცინაციას პირდაპირ ადგილზე, დაჭერის წერტილში განახორციელებს, თავშესაფარში გადაყვანის გარეშე.
განკარგულებით ზუსტად განისაზღვრა რეგიონების მიხედვით მუნიციპალური თავშესაფრების არეალი:
საიდან აჰყავთ ცხოველი (რეგიონი) რომელ თავშესაფარში გადაჰყავთ მცხეთა-მთიანეთი ქ. თბილისის ცხოველთა მუნიციპალური თავშესაფარი კახეთი და ქვემო ქართლი გურჯაანის ცხოველთა მუნიციპალური თავშესაფარი შიდა ქართლი და სამცხე-ჯავახეთი გორის ცხოველთა მუნიციპალური თავშესაფარი იმერეთი, რაჭა-ლეჩხუმი/ქვემო სვანეთი, გურია, სამეგრელო-ზემო სვანეთი ქ. ქუთაისის ცხოველთა მუნიციპალური თავშესაფარი
ცვლილებები ეხება საკუთრებაში მყოფ ცხოველებსაც. ჰუმანური მეთოდების პოპულარიზაციის მიზნით, სახელმწიფო გეგმავს, სავარაუდოდ, 13 619 პატრონიანი ძუ ძაღლის სტერილიზაციას (მომსახურების შესყიდვის გზით) და საჭიროების შემთხვევაში, მათ იდენტიფიკაცია-რეგისტრაციას.