რომელი ქალაქებია საცხოვრებლად საუკეთესო და ყველაზე უარესი - TOP 10

Economist Intelligence Unit-მა (EIU) 2026 წლის საცხოვრებლად საუკეთესო ქალაქების გლობალური ინდექსის ანგარიში გამოაქვეყნა.

კვლევამ მსოფლიოს 173 ქალაქი ხუთი ძირითადი კატეგორიის მიხედვით შეაფასა, ესენია: სტაბილურობა, ჯანდაცვა, კულტურა და გარემო, განათლება და ინფრასტრუქტურა.

მაქსიმალური 100 ქულიანი შეფასებით, ინდექსი გვიჩვენებს, თუ სად არის ქალაქური ცხოვრება ყველაზე კომფორტული და სად აქვს გეოპოლიტიკურ, ეკონომიკურ თუ ინფრასტრუქტურულ პრობლემებს მოსახლეობის ცხოვრების ხარისხზე ყველაზე დიდი გავლენა.

2026 წლის ინდექსში პირველ ადგილს დანიის დედაქალაქი, კოპენჰაგენი იკავებს საერთო ქულით 98. ქალაქმა მაქსიმალური 100 ქულა მიიღო სტაბილურობის, განათლებისა და ინფრასტრუქტურის კატეგორიებში, ხოლო მაღალი შეფასებები დაიმსახურა კულტურა და გარემოსა (95) და ჯანდაცვის (96) მიმართულებით.

საუკეთესო ათეულში შვეიცარია ორჯერაა წარმოდგენილი: ციურიხი მე-5 ადგილს იკავებს, ხოლო ჟენევა - მე-6 ადგილს (ორივეს საერთო ქულაა 96).

იაპონიიდანაც ათეულში ორი ქალაქი მოხვდა: ოსაკა მე-7 ადგილზეა, ხოლო ტოკიო მე-10-ზე.

რაც შეეხება ავსტრალიას, ის საუკეთესო ათეულში სამი ქალაქითაა წარმოდგენილი.

TOP 10 საცხოვრებლად ყველაზე ხელსაყრელი ქალაქი, 2026

# ქალაქი ქვეყანა შეფასება სტაბილურობა ჯანდაცვა კულტურა და გარემო განათლება ინფრასტრუქტურა 1 კოპენჰაგენი დანია 98 100 96 95 100 100 2 ვენა ავსტრია 97 95 100 94 100 100 3 მელბურნი ავსტრალია 97 95 100 96 100 96 4 სიდნეი ავსტრალია 97 95 100 94 100 96 5 ციურიხი შვეიცარია 96 95 100 94 100 96 6 ჟენევა შვეიცარია 96 95 100 92 100 96 7 ოსაკა იაპონია 96 100 100 87 100 96 8 ადელაიდა ავსტრალია 96 95 100 91 100 96 9 ვანკუვერი კანადა 96 95 96 97 100 93 10 ტოკიო იაპონია 96 100 100 89 100 93

საუკეთესო ათეულის საპირისპიროდ, ინდექსის მეორე პოლუსზე მდებარე ბოლო ათეული მიმდინარე კონფლიქტების, ეკონომიკური არასტაბილურობისა და ინფრასტრუქტურული დეფიციტის მძიმე შედეგებს ასახავს.

სირიის დედაქალაქი დამასკო კვლავ ინდექსის ბოლო პოზიციაზეა (173-ე ადგილი) საერთო ქულით 32. ქალაქს სერიოზული გამოწვევები აქვს ყველა შეფასებულ სფეროში: სტაბილურობაში მან მხოლოდ 20 ქულა მიიღო, ჯანდაცვასა და განათლებაში - 33, ხოლო ინფრასტრუქტურაში - 32.

კონფლიქტები კვლავაც უარყოფითად აისახება სხვადასხვა რეგიონის ცხოვრების ხარისხზე. უკრაინის დედაქალაქი კიევი 166-ე ადგილზეა 45 საერთო ქულით. მიუხედავად იმისა, რომ კიევი ინარჩუნებს შედარებით მაღალ მაჩვენებელს განათლებაში (75) და კულტურა და გარემოში (53), მისი სტაბილურობის რეიტინგი 40-მდეა შემცირებული, ხოლო ინფრასტრუქტურა 27 ქულით ფასდება.

10 საცხოვრებლად ყველაზე ნაკლებად ხელსაყრელი ქალაქი, 2026

# ქალაქი ქვეყანა საერთო შეფასება სტაბილურობა ჯანდაცვა კულტურა და გარემო განათლება ინფრასტრუქტურა 164 თეირანი ირანი 45 40 63 37 58 39 165 ჰარარე ზიმბაბვე 45 40 33 57 67 36 166 კიევი უკრაინა 45 40 42 53 75 27 167 პორტ-მორსბი პაპუა-ახალი გვინეა 44 30 42 53 58 46 168 ლაგოსი ნიგერია 44 30 38 54 42 54 169 ალჟირი ალჟირი 43 35 54 45 58 30 170 კარაჩი პაკისტანი 43 20 54 36 75 52 171 დაკა ბანგლადეში 42 45 42 41 67 27 172 ტრიპოლი ლიბია 41 30 50 38 58 41 173 დამასკო სირია 32 20 33 41 33 32

ანგარიშის თანახმად, მაღალი რეიტინგის მქონე ქალაქები ძლიერი სოციალური დაცვის სისტემებით, სტაბილური პოლიტიკური გარემოთი და განვითარებული ჯანდაცვის სექტორით სარგებლობენ. ამის საპირისპიროდ, რეიტინგის ბოლოში მყოფი ქალაქები სისტემური პრობლემების წინაშე დგანან, რაც საბაზისო მომსახურებებზე მუდმივ ხელმისაწვდომობას უშლის ხელს.

გარდა ამისა, საუკეთესო ათეულში შემავალი ყველა ქალაქის მიერ განათლებაში მიღებული 100 ქულა მიუთითებს, რომ საგანმანათლებლო სისტემები კვლავაც მაღალ დონეზეა ორგანიზებული და ხელმისაწვდომია წამყვან ურბანულ ცენტრებში.

ამასთან, მაშინ როდესაც ლიდერი ქალაქების ინფრასტრუქტურული მაჩვენებლები თითქმის მაქსიმალურია, რეიტინგის ბოლოში მყოფ რამდენიმე ქალაქში ეს ნიშნული 40 ქულაზე დაბალია. ეს კიდევ ერთხელ უსვამს ხაზს იმ სირთულეებს, რომლებიც სოციალურ-ეკონომიკური კრიზისების ფონზე სატრანსპორტო, ენერგეტიკული და საცხოვრებელი სისტემების შენარჩუნებასთანაა დაკავშირებული.