რუსეთ-უკრაინის მოლაპარაკებები შეჩერებულია - მარკო რუბიო
აშშ-ის სახელმწიფო მდივანმა მარკო რუბიომ უკრაინასა და რუსეთს შორის ვაშინგტონის შუამავლობით მიმდინარე სამშვიდობო მოლაპარაკებების შეჩერება ოფიციალურად გამოაცხადა. ამერიკელმა მაღალჩინოსანმა პროცესის უშედეგობა შვედეთში გამართული NATO-ს მინისტერიალის დასრულების შემდეგ საჯაროდ დაადასტურა.
მისი განცხადებით, ვაშინგტონი პროდუქტიული დიალოგის მხარდაჭერისთვის კვლავაც მზადაა, თუმცა, მისივე თქმით, ამჟამად მსგავსი ორმხრივი კონსულტაციები საერთოდ არ მიმდინარეობს.
აღსანიშნავია, რომ თეთრ სახლში მოლაპარაკებების პროცესში პროგრესის არარსებობას ბოლო რამდენიმე თვის განმავლობაში უკვე ღიად გრძნობდნენ. პრეზიდენტმა ტრამპმა არაერთხელ თქვა, რომ პროცესი რიგი მიზეზების გამო ჭიანურდებოდა.
როგორც ცნობილია, ოფიციალური კიევი და მოსკოვი დონბასის რეგიონის ტერიტორიულ საკითხებზე პოზიციებს კვლავ ვერ აჯერებენ. უკრაინის საგარეო უწყების ხელმძღვანელის, ანდრიი სიბიჰას თქმით, პროცესისთვის "ახალი იმპულსის მიცემაა საჭირო", რაც, მისი თქმით, ევროპელი პარტნიორების აქტიური ჩართულობის გარეშე ვერ მოხერხდება. რაც შეეხება თავად ევროპის პოზიციას, ზოგიერთი ლიდერი უპირატესად რუსეთის ფედერაციასთან პირდაპირი დიალოგის დაწყებას მიიჩნევს, თუმცა კონტინენტის წამყვან სახელმწიფოებს ერთიანი დღის წესრიგი ან საერთო წარმომადგენელი ამ დრომდე არ ჰყავთ.
ცნობისთვის, რუსეთ-უკრაინის ომის დასრულებასთან დაკავშირებით აშშ-ის შუამავლობით ბოლო თვეებში გამართულ ორმხრივ და სამმხრივ შეხვედრებს კონკრეტული შედეგი არ გამოუღია.
BM.GE
წყარო: bm.ge