"რუსეთი ჩვენს ინფრასტრუქტურაზე თავდასხმებს გეგმავს" - ლიეტუვას პრეზიდენტი
ლიეტუვას პრეზიდენტის, გიტანას ნაუსედას განცხადებით, რუსეთი ქვეყნის ინფრასტრუქტურულ ობიექტებზე თავდასხმებს გეგმავს. როგორც ირკვევა, ქვეყნის სადაზვერვო სამსახურებმა შესაბამისი ინფორმაცია უკვე მოიპოვეს. პრეზიდენტის თქმით, ამ გარემოების გამო ენერგეტიკულ და სატრანსპორტო ობიექტებზე უსაფრთხოების ზომები გამკაცრდება.
სააგენტო BNS-თან ინტერვიუში პრეზიდენტს თავდასხმის კონკრეტული დრო და ადგილი არ დაუსახელებია. ლიდერის განმარტებით, მოწინააღმდეგეს დაგეგმვის პროცესი ჯერ არ დაუსრულებია. თუმცა ნაუსედა აღნიშნავს, რომ მოსალოდნელი დივერსიის მიზანი ინფრასტრუქტურის ფიზიკური დაზიანება და ობიექტების ფუნქციონირების შეჩერება იქნება. შესაბამისად, არსებობს მოლოდინი, რომ რუსეთი ფართომასშტაბიან დარტყმებს განახორციელებს.
საყურადღებოა, რომ ბალტიისპირეთის ქვეყნებსა და პოლონეთში რუსული თავდასხმების საფრთხეზე უკვე დასავლური სადაზვერვო სააგენტოებიც საუბრობენ, თუმცა მოსკოვი ბრალდებებს უარყოფს და გავრცელებულ ცნობებს ანტირუსულ პროპაგანდას უწოდებს.
შეგახსენებთ, ლიეტუვა რუსეთის ექსკლავს, კალინინგრადსა და ბელარუსს ესაზღვრება. შესაძლო საფრთხის გამო კი ქვეყნის ხელისუფლებამ 2022 წლიდან დღემდე თავდაცვის ბიუჯეტი გაასამმაგა.
BM.GE
წყარო: bm.ge