რუსეთი ეკონომიკას პოლიტიკური ზეწოლისთვის იყენებს, ამიტომ ევროპა სომხეთის გვერდით დგას - ურსულა ფონ დერ ლაიენი

სომხეთისთვის მხარდაჭერის პაკეტს ვამზადებთ, რაც მოიცავს დაუყოვნებლივ ფინანსურ დახმარებასაც, რომლის მოცულობაც 50 მლნ ევროს აღემატება - ამის შესახებ ევროკომისიის პრეზიდენტმა ურსულა ფონ დერ ლაიენმა განაცხადა.

ევროკომისიის პრეზიდენტის თქმითვე, ტელეფონით ესაუბრა სომხეთის პრემიერ-მინისტრს ნიკოლ ფაშინიანს და საუბრის მთავარი თემა არჩევნების წინ რუსეთის ქმედებები იყო. ურსულა ფონ დერ ლაიენის განცხადებით, ევროკავშირისთვის რუსეთისგან პოლიტიკური ზეწოლის იარაღად ეკონომიკური ურთიერთობების გამოყენება უცხო არ არის.

"დღეს პრემიერ-მინისტრ ნიკოლ ფაშინიანს ვესაუბრე სომხეთის წინააღმდეგ რუსეთის მიერ ბოლო დროს დაწესებულ შეზღუდვებზე. ეს სხვა არაფერია, თუ არა ეკონომიკური იძულება, რაც სრულიად მიუღებელია. სომხურ პროდუქციაზე ექსპორტის შეზღუდვების გაფართოებით მოსკოვი ეკონომიკურ ურთიერთობებს პოლიტიკური ზეწოლის იარაღად იყენებს. ჩვენ ეს კარგად ვიცით. სწორედ ამიტომ, ევროპა მტკიცედ დგას სომხეთის გვერდით.

ჩვენ ვამზადებთ ევროკავშირის მხარდაჭერის პაკეტს. იგი მოიცავს დაუყოვნებელ ფინანსურ დახმარებას, რომლის ღირებულებაც 50 მილიონ ევროზე მეტია. ეს პაკეტი ასევე ითვალისწინებს ზომებს გარკვეული სომხური პროდუქციის, განსაკუთრებით კი აგროსასურსათო საქონლის ვაჭრობის გასამარტივებლად, ისევე როგორც პრაქტიკულ მხარდაჭერას იმ დაზარალებული სექტორებისთვის, როგორიცაა მაგალითად, სომხური ყვავილების წარმოება, რადგან რუსეთმა ბოლო დროს საეჭვო ბრალდებების საფუძველზე, სომხეთიდან ყვავილების იმპორტი შეზღუდა. დაგეგმილია, რომ 10 000 ყვავილისგან შემდგარი პირველი პარტია ხვალ ლატვიაში ჩავა, მას კი სხვა გზავნილებიც მოჰყვება.

უფრო გრძელვადიან პერსპექტივაში, მე გამოვხატე ევროპის მზადყოფნა, შეასრულოს ამბიციური „დაკავშირებადობის პარტნიორობა“, რომელსაც საფუძველი სამიტზე ჩაეყარა. თურქეთთან სავაჭრო გზების ბოლოდროინდელი გახსნა, მათ შორის სარკინიგზო კავშირი საქართველოსა და თურქეთის გავლით, წინ გადადგმული შესანიშნავი ნაბიჯია. სომხეთს აქვს პოტენციალი გახდეს სტრატეგიული ჰაბი, რომელიც ერთმანეთთან დააკავშირებს ევროპას, სამხრეთ კავკასიასა და ცენტრალურ აზიას", - აცხადებს ურსულა ფონ დერ ლაიენი.