რუსეთი ხორბალზე ექსპორტის გადასახადს 2.2-ჯერ ზრდის - გაზრდილი ტარიფი 25 აგვისტომდე იმოქმედებს

19 აგვისტოდან რუსეთიდან ხორბლის ექსპორტის გადასახადი 2.2-ჯერ იზრდება. "ინტერფაქსი" რუსეთის სოფლის მეურნეობის სამინისტროზე დაყრდნობით წერს, რომ 19 აგვისტოდან ხორბლის ექსპორტზე საბაჟო გადასახადი ტონაზე 721,1 რუბლი იქნება. მოქმედ ტარიფთან (326,6 რუბლი ტონაზე) შედარებით, ხორბლის საექსპორტო გადასახადი 2,2-ჯერ იზრდება.

რაც შეეხება სხვა კულტურებს, ქერზე ექსპორტის გადასახადი ნულოვან დონეზე დარჩება, ხოლო სიმინდზე გადასახადი 105 რუბლიდან 284 რუბლამდე გაიზრდება. სააგენტოს ცნობითვე, აღნიშნული გადასახადები ძალაში 25 აგვისტომდე დარჩება.

საქართველოს ხორბლისა და ფქვილის მწარმოებელთა ასოციაციის ინფორმაციით, რუსეთის ფედერაციამ მარცვლეულის დემპერის მექანიზმი 2021 წლის 2 ივნისს შემოიღო. ის ითვალისწინებს ხორბლის, სიმინდისა და ქერის ექსპორტზე მცურავი გადასახადების დაწესებას და ამ გადასახადებიდან მიღებული შემოსავლის დაბრუნებას სოფლის მეურნეობის მწარმოებლების სუბსიდირებისთვის. გადასახადის ოდენობა ყოველკვირეულად გამოითვლება მოსკოვის ბირჟაზე რეგისტრირებული ექსპორტის კონტრაქტის ფასების საფუძველზე ინდიკატორების გამოყენებით. გადასახადი შეადგენს საბაზისო და საორიენტაციო ფასებს შორის სხვაობის 70%-ს.ამჟამად, ხორბლის საბაზისო ფასი ტონაზე 18,000 რუბლს შეადგენს, ხოლო ქერისა და სიმინდის - ტონაზე 17,875 რუბლს.