რუსეთი თურქეთიდან ბენზინის პირველ საზღვაო ტვირთს მიიღებს

საწვავის მზარდი დეფიციტის ფონზე, რუსეთი თურქეთიდან ბენზინის პირველ საზღვაო ტვირთს მიიღებს. S&P Global Commodities at Sea-ს მონაცემებით, ტანკერი Wendrix-ი 200,000 ბარელი ბენზინით რუსეთში მომავალ კვირას ჩავა. ამ ნაბიჯით თურქეთი რუსეთის მომარაგების ახალი მარშრუტი ხდება, რადგან აქამდე იმპორტი ინდოეთიდან ეგვიპტის გავლით და მაროკოდან ხორციელდებოდა. საერთო ჯამში, ბოლო ერთ თვეში რუსეთის საზღვაო იმპორტმა 1 მილიონ ბარელს გადააჭარბა.

პარალელურად, უკრაინის სამხედრო ძალებმა რუსეთის ენერგეტიკულ ინფრასტრუქტურაზე იერიში მიიტანეს. ამ ქმედებამ ქვეყანაში საწვავის წარმოება მნიშვნელოვნად შეამცირა. S&P Global Energy CERA-ს ანალიტიკოსების შეფასებით, ივლისში ნავთობის გადამუშავება 28%-ით დაეცა და დღიურმა მაჩვენებელმა 3.7 მილიონი ბარელი შეადგინა. აგვისტოში რუსეთის ნავთობგადასამუშავებელ ქარხნებზე უკვე 17 თავდასხმა დაფიქსირდა და ეს მონაცემი ივლისის სტატისტიკას უთანაბრდება. როგორც 19 აგვისტოს რუსეთის ვიცე-პრემიერმა ალექსანდრ ნოვაკმა აღნიშნა, ბაზარზე დაძაბულობის მეორე ფაზა დაიწყო. შექმნილი კრიზისის საპასუხოდ, მოსკოვმა 2027 წლის იანვრის ბოლომდე ბენზინის ექსპორტი სრულად აკრძალა.

ამასთან, დიზელის ექსპორტზე დაწესებული შეზღუდვები აგვისტოს ბოლომდე მოქმედებს, თუმცა მისი გახანგრძლივებაც განიხილება. დამატებით, რუსული მედიის ცნობით, მთავრობა არომატული ნახშირწყალბადების ექსპორტის შეზღუდვასაც გეგმავს. ცნობილი გახდა ისიც, რომ ორენბურგის ოლქში მდებარე ორსკის ქარხნის სრულად აღდგენას ექვსი თვე დასჭირდება.

შეგახსენებთ, ტანკერი Wendrix-ი ევროკავშირის, დიდი ბრიტანეთის, უკრაინისა და შვეიცარიის სანქციების ქვეშ იმყოფება. ამასთან, უკრაინულ სანქცირებულთა სიაში შეყვანილია თურქეთის მერსინის პორტიც, რომელიც რუსეთთან კავშირში ეჭვმიტანილად მიიჩნევა.