რუსეთის დუმამ პუტინს უცხო ქვეყნებზე თავდასხმის უფლება მისცა
რუსეთის სახელმწიფო დუმამ დაამტკიცა კანონპროექტი, რომელიც პრეზიდენტ ვლადიმერ პუტინს უცხო ქვეყნებში შეიარაღებული ძალების გაგზავნის და მათ წინააღმდეგ სამხედრო მოქმედებების დაწყების უფლებას აძლევს.
დოკუმენტის თანახმად, მოსკოვი სამხედრო ინტერვენციას იმ შემთხვევაში განახორციელებს, თუ რუსეთის მოქალაქეებს საერთაშორისო სასამართლოები ან უცხოური სახელმწიფოები დევნას დაუწყებენ. როგორც ირკვევა, ინიციატივა ვრცელდება იმ შემთხვევებზეც, როდესაც რუსეთის მოქალაქეები სხვადასხვა ორგანიზაციების მხრიდან რაიმე სახის ზეწოლას განიცდიან. დოკუმენტზე ხელმოსაწერად რუსეთის პრეზიდენტს 14 დღე აქვს.
კანონპროექტის განხილვისას რუსეთის პარლამენტის თავმჯდომარემ, ვიაჩესლავ ვოლოდინმა თქვა, რომ ამჟამინდელი დასავლური მართლმსაჯულება რეპრესიულ მანქანადაა ქცეული. მისი თქმით, ევროპელი ჩინოვნიკები გადაწყვეტილებებს რუსეთის ინტერესებს საწინააღმდეგოდ იღებენ და რუსეთის მოქალაქეების უფლებებს არღვევენ. შესაბამისად, მიღებული კანონი პრეზიდენტს მოქმედებისთვის სამართლებრივ საფუძველს შეუქმნის.
უკრაინის საგარეო საქმეთა სამინისტროში ფიქრობენ, რომ ეს ნაბიჯი რუსული ექსპანსიონიზმის ნორმალიზებას ემსახურება. უწყების პრესსპიკერმა, გიორგი ტიხიმ ამ გადაწყვეტილებას "აგრესიული უკანონობა" უწოდა. მისი განცხადებით, პუტინი უცხო ქვეყნებში ოკუპაციის ლეგალიზებას ცდილობს.
საყურადღებოა, რომ ევროპელი მაღალჩინოსნები მოსკოვის მხრიდან ალიანსის ერთიანობის გამოცდას უახლოეს ორ წელიწადში მოელიან. ანალიტიკოსების შეფასებით, ეს რისკი განსაკუთრებით მაღალი იქნება იმ შემთხვევაში, თუ ევროპა საკუთარი სამხედრო შესაძლებლობების გაძლიერებას ვერ შეძლებს.
შეგახსენებთ, ვოლოდიმირ ზელენსკიმ ადრე განაცხადა, რომ უკრაინის არასაკმარისი მხარდაჭერის შემთხვევაში, რუსეთის შემდეგი სამიზნე ბალტიისპირეთის ქვეყნები იქნებიან.
BM.GE
წყარო: bm.ge