რუსეთის ეკონომიკური განვითარების მინისტრმა ვლადიმირ პუტინს ქვეყნის ეკონომიკური მდგომარეობის შესახებ ანგარიში წარუდგინა

რუსეთის ეკონომიკური განვითარების მინისტრმა ვლადიმირ პუტინს ქვეყნის ეკონომიკური მდგომარეობის შესახებ ანგარიში წარუდგინა, რომელიც მაქსიმალურად პოზიტიურად და იმედის მომცემად გამოიყურება და სრულად უგულებელყოფს რეკორდულად გაზრდილ ბიუჯეტის დეფიციტს, შემცირებულ შემოსავლებს და გაზრდილ საგადასახადო წნეხს.

რეალობის წარმოჩენის ნაცვლად, მაქსიმ რეშეტნიკოვმა ქვეყნის მაკროეკონომიკური მაჩვენებლები შეაჯამა და სამომავლო სტრუქტურული რეფორმების გეგმები წარადგინა. როგორც რეშეტნიკოვი აცხადებს, ბოლო სამი წლის განმავლობაში რუსეთის ეკონომიკური ზრდა რეალურ გამოხატულებაში 10%-ს შეადგენს, მსყიდველობითი უნარის პარიტეტის მიხედვით კი ქვეყანა მსოფლიოში მეოთხე პოზიციას ინარჩუნებს.

მნიშვნელოვანია ითქვას, რომ მინისტრის განცხადებით, რუსეთმა აშშ-სთან ერთ სულ მოსახლეზე მშპ-ის მაჩვენებლით არსებული სხვაობა მნიშვნელოვნად შეამცირა. თუ 2017 წელს ეს მაჩვენებელი აშშ-ის დონის 43%-ს შეადგენდა, 2025 წლის ბოლოსთვის ის 56%-ს მიუახლოვდა. რეშეტნიკოვის შეფასებით, მიუხედავად პირველ კვარტალში დაფიქსირებული მცირე ვარდნისა, მარტში ეკონომიკური აქტივობა 1.8%-ით გაიზარდა, რაც მდგომარეობის სტაბილიზაციაზე მიუთითებს. ამასთან, ბოლო სამ წელიწადში მოსახლეობის რეალური შემოსავლები 26%-ით არის გაზრდილი, ინფლაციის დონემ კი მაისის დასაწყისისთვის 5.6% შეადგინა.

რეშეტნიკოვის განმარტებით, მთავრობის ახალი მიზანი 3 მილიონი ადამიანის შრომის ეკვივალენტური რესურსის ოპტიმიზაციაა რობოტიზაციისა და ხელოვნური ინტელექტის გამოყენებით. საუბარია არა კადრების შემცირებაზე, არამედ ადმინისტრაციული ხარჯების დაზოგვასა და გამოთავისუფლებული ფინანსების ძირითადი პერსონალის, მაგალითად, ექიმებისა და მასწავლებლების ხელფასებისკენ მიმართვაზე.