რუსეთმა 2026 წლის ეკონომიკური ზრდის პროგნოზი თითქმის ნულამდე შეამცირა

რუსეთის ოფიციალური პროგნოზით, 2026 წლისთვის ქვეყნის მთლიანი შიდა პროდუქტის ზრდის ტემპი აქამდე ნავარაუდები 1.3%-იდან 0.4%-მდე შემცირდა, საპროგნოზო ინფლაციის მაჩვენებელი კი 4%-იდან 5.2%-მდე გაიზარდა.

რუსეთის ვიცე-პრემიერ ალექსანდრ ნოვაკის განცხადებით, 2026 წლის ეკონომიკური ზრდის ნიშნული 0.4%-ით განისაზღვრა, ხოლო 2027 წლის პროგნოზმა 1.4% შეადგინა. აღსანიშნავია, რომ ეკონომიკური განვითარების სამინისტროს წინა ოფიციალური მონაცემებით, რომელიც 2025 წლის სექტემბერში გამოქვეყნდა, 2026 წელს მშპ-ის 1.3%-იანი, 2027 წელს — 2.8%-იანი, ხოლო 2028 წელს 2.5%-იანი ზრდა იყო მოსალოდნელი.

ალექსანდრ ნოვაკმა მაჩვენებლების გაუარესება ქვეყანაში არსებულ "ზომიერად მკაცრ" მონეტარულ პოლიტიკას დაუკავშირა, რაც, მისი შეფასებით, შენელებული ეკონომიკური ზრდის პერიოდს ახანგრძლივებს.

ამასთან, ქვეყანაში მკვეთრად გაიზარდა ზარალზე მომუშავე ბანკების რაოდენობა. ცნობისთვის, თუ 2026 წლის 1 იანვრის მდგომარეობით რუსეთში 34 ასეთი ფინანსური ინსტიტუტი ფიქსირდებოდა, მარტის დასაწყისისთვის მათმა რიცხვმა 60-ს მიაღწია.