რუსეთმა ქართული წარმოების ღვინის და არაალკოჰოლური სასმლის ნაწილის იმპორტი დროებით შეზღუდა - RBC

რუსული მედიის თანახმად, რუსეთის მარეგულირებელმა ქართული სასმელების (ღვინის და არაალკოჰოლური სასმლის) ნაწილის იმპორტი და გაყიდვა დროებით აკრძალა. როგორც RBC შესაბამის დოკუმენტსა და წყაროზე დაყრდნობით წერს, გადაწყვეტილება როსპოტრებნადზორმა მიიღო - სახელმწიფო უწყებამ, რომელიც მომხმარებელთა უფლებების დაცვასა და სანიტარიულ-ეპიდემიოლოგიურ ზედამხედველობაზეა პასუხისმგებელი.

გამოცემა წერს, რომ მარეგულირებელმა გამოავლინა გაყიდვისთვის აკრძალული სასმელები, რომლებიც არ შეესაბამება დადგენილ მოთხოვნებს ორგანოლეპტიკური, ფიზიკურ-ქიმიური და უსაფრთხოების მაჩვენებლების მიხედვით.

"დოკუმენტის თანახმად, ევრაზიის ეკონომიკური კომისიის საბჭოს გადაწყვეტილების საფუძველზე, ქვეყანაში დროებითი სანიტარიული ღონისძიება ამოქმედდა, რაც გულისხმობს იმ პროდუქციის იმპორტისა და ქვეყნის ტერიტორიაზე ბრუნვის შეჩერებას, რომელიც არ შეესაბამება დადგენილ მოთხოვნებს ორგანოლეპტიკური, ფიზიკურ-ქიმიური და უსაფრთხოების მაჩვენებლების მიხედვით",- წერია სტატიაში.

კერძოდ, RBC წერს, რომ აკრძალვა შეეხო შემდეგ პროდუქტებს:

• „თელიანის ველის“ წარმოების ღვინო; • „თბილღვინოს“ წარმოების ღვინო; • „ასკანელი ძმების“ წარმოების ღვინო და კონიაკი; • „ვაინმენის“ წარმოების ღვინო; • „საქართველოს ლუდის კომპანიის“ წარმოების ლუდი; • საქართველოში წარმოებული გაზიანი უალკოჰოლო სასმელი - Coca-Cola; • „ჰელსი უოთერის“ მიერ წარმოებული მინერალური წყალი „ნაბეღლავი“.

გამოცემა ასევე წერს, რომ მაისში უწყებამ ბაზარზე აღმოაჩინა სომხური ალკოჰოლური პროდუქცია, რომელიც სავალდებულო მოთხოვნებს არ შეესაბამებოდა, რის შემდეგაც რუსეთში მისი რეალიზაციის შეჩერების განკარგულება გასცა. შეზღუდვები შეეხო სომხეთის სამ მწარმოებელს: VEDI-ALCO-ს, აბოვიანის კონიაკის ქარხანასა და ღვინისა და კონიაკის სახლ „შაჰნაზარიანს“. აპრილში როსპოტრებნადზორმა ასევე შეაჩერა სომხური მინერალური წყლის, „ჯერმუკის“ (Jermuk), ცალკეული პარტიების იმპორტი და რეალიზაცია ჯანმრთელობისთვის შესაძლო საფრთხის გამო.

BMG საკითხთან დაკავშირებით საქართველოს ღვინის ეროვნულ სააგენტოს დაუკავშირდა, სადაც საკითხზე ინფორმირებულნი არ არიან. ასევე, ვცდილობთ დამატებითი ინფორმაციისთვის შესაბამის კომპანიებს დავუკავშირდეთ.