რუსეთმა სომხეთიდან ყვავილების იმპორტი აკრძალა
მოსკოვსა და ერევანს შორის ურთიერთობების გაუარესების ფონზე, რუსეთის ხელისუფლებამ სომხეთიდან ყვავილების იმპორტზე დროებითი შეზღუდვები დააწესა.
The Moscow Times-ის ინფორმაციით, რუსეთის სოფლის მეურნეობის ზედამხედველობის სამსახურმა, Rosselkhoznadzor-მა გადაწყვეტილება ქვეყნის ფიტოსანიტარიული უსაფრთხოების დაცვის მოტივით ახსნა, რომელიც ძალაში 22 მაისიდან შევა.
უწყების განცხადებით, სომხური ხილისა და ბოსტნეულის პარტიებში სახიფათო მწერებისა და ბაქტერიების აღმოჩენის 146 შემთხვევა დაფიქსირდა, რაც პრობლემას წარმოადგენს. ამასთან, რუსული მხარე სომხეთს ევროპული წარმოების კალმახის ფალსიფიცირებულ მიწოდებაში, ასევე ყველის, კარაქის, მინერალური წყლისა და კონიაკის ხარისხის დარღვევაში ადანაშაულებს.
როგორც ირკვევა, სავაჭრო შეზღუდვებს წინ უსწრებდა რუსეთის უშიშროების საბჭოს მდივნის, სერგეი შოიგუს განცხადება, რომელმაც ერევანი მოსკოვის მიმართ არამეგობრულ ნაბიჯებში დაადანაშაულა. რუსული მხარის უკმაყოფილება მაისის დასაწყისში ერევანში გამართულ ევროპული პოლიტიკური გაერთიანების სამიტზე უკრაინის პრეზიდენტ ვოლოდიმირ ზელენსკის გამოსვლამ და სომხეთის მიერ სისხლის სამართლის საერთაშორისო სასამართლოს რომის სტატუტის რატიფიცირებამ გამოიწვია. შოიგუმ სომხური მხარე რუსეთის მოქალაქეების მესამე ქვეყნებში ექსტრადიციასა და რუსული ბიზნესსუბიექტებისთვის პირობების განზრახ გაუარესებაშიც დაადანაშაულა.
BM.GE
წყარო: bm.ge