რუსეთმა უცხოელ დიპლომატებს კიევის სასწრაფოდ დატოვებისკენ მოუწოდა
რუსეთის საგარეო საქმეთა სამინისტრომ უცხოეთის მოქალაქეებსა და დიპლომატებს უკრაინის დედაქალაქის სასწრაფოდ დატოვებისკენ მოუწოდა. არსებული ინფორმაციით, მოსკოვი კიევში მდებარე სამხედრო-სამრეწველო ობიექტებსა და „გადაწყვეტილების მიღების ცენტრებზე“ ახალი სისტემური დარტყმების განხორციელებას გეგმავს.
აღსანიშნი ფაქტია, რომ ამ გაფრთხილებას წინ უკრაინის დედაქალაქზე განხორციელებული მასშტაბური თავდასხმა უძღოდა. მაშინ განხორციელებული სარაკეტო დარტყმების შედეგად ორი ადამიანი დაიღუპა. სხვადასხვა სიმძიმის დაზიანებები კი 90-ზე მეტმა მოქალაქემ მიიღო. კიევში აღნიშნავენ, რომ რუსული მხარის მიერ გაფრთხილების გაჟღერება "თვალთმაქცურია", რადგან უცხოეთის მოქალაქეებისთვის წინა დარტყმებიც არანაკლებ საფრთხეს ქმნიდა.
მნიშვნელოვანია ითქვას, რომ ოფიციალურ გაფრთხილებამდე ცოტა ხნით ადრე რუსეთის საგარეო საქმეთა მინისტრი სერგეი ლავროვი აშშ-ის სახელმწიფო მდივან მარკო რუბიოს ტელეფონით ესაუბრა. რუსმა დიპლომატმა ამერიკელ კოლეგას კიევში მდებარე საელჩოდან პერსონალის სასწრაფო ევაკუაციისკენ მოუწოდა.
როგორც კრემლში აცხადებენ, დაგეგმილი დარტყმები პასუხია კიევის მიერ ოკუპირებულ ლუჰანსკში განხორციელებულ იმ შეტევაზე, როცა მომხდარს 21 ადამიანის სიცოცხლე ემსხვერპლა.
ცნობისთვის, მიმდინარე თვის დასაწყისში რუსეთმა უცხოელ მოქალაქეებს კიევის დატოვებისკენ ერთხელ უკვე მოუწოდა. მაშინ ეს მუქარა წითელ მოედანზე დაგეგმილი სამხედრო აღლუმის ჩაშლის რისკების გადასაზღვევად იქნა გაჟღერებული.
BM.GE
წყარო: bm.ge