რუსეთმა ყაზახეთთან $16.5 მილიარდიანი შეთანხმება გააფორმა - რას მოიცავს გარიგება?
რუსეთის ფედერაციამ ყაზახეთთან პირველი ატომური ელექტროსადგურის მშენებლობის შესახებ შეთანხმება გააფორმა. არსებული ინფორმაციით, ცენტრალურ აზიაში უმსხვილესი ენერგეტიკული პროექტის ჯამური ღირებულება დაახლოებით $16.5 მილიარდი იქნება.
მოსკოვი პარტნიორ ქვეყანას სამუშაოების ნაწილობრივ დასაფინანსებლად მასშტაბურ საექსპორტო კრედიტს გამოუყოფს. შესაბამის ოფიციალურ დოკუმენტს ქვეყნების ლიდერებმა ხელი ასტანაში გამართული შეხვედრის ფარგლებში მოაწერეს.
რაც შეეხება უშუალოდ ობიექტს, ახალი მაღალტექნოლოგიური სადგური ქვეყნის სამხრეთ-აღმოსავლეთ ნაწილში, ბალხაშის ტბის სანაპიროზე მდებარე სოფელ ულკენში აშენდება და ის ექსპლუატაციაში მომავალ ათწლეულში შევა.
ყაზახეთის პრეზიდენტმა ყასიმ-ჟომართ თოყაევმა რუს კოლეგას, ვლადიმირ პუტინს გაწეული მხარდაჭერისთვის მადლობა გადაუხადა და ახალი ერთობლივი პროექტის უდიდეს სტრატეგიულ მნიშვნელობაზე ისაუბრა. ვლადიმირ პუტინმა კი თქვა, რომ ახალი სადგური ყაზახეთის ეკონომიკის უსაფრთხო ენერგომომარაგებაში მნიშვნელოვან წვლილს შეიტანს.
ცნობისთვის, მსოფლიოში ურანის უმსხვილეს მწარმოებლად მიჩნეული ყაზახეთი საკუთარი ატომური ელექტროსადგურის აშენებისგან თავს ორი ათწლეულის განმავლობაში იკავებდა. თუმცა მოსახლეობამ პროექტის განხორციელებას მხარი 2024 წლის საყოველთაო რეფერენდუმზე დაუჭირა, რის შემდეგაც ხელისუფლებამ პარტნიორებთან მუშაობა აქტიურად დაიწყო.