რუსეთს LNG-ის ექსპორტიდან შემოსავლები საგრძნობლად შეუმცირდა

აზიის ბაზრებზე იძულებითი გადასვლის გამო, რუსული თხევადი ბუნებრივი აირის (LNG) ლოგისტიკისა და ტრანსპორტირების ხარჯები გაორმაგდა, რამაც ქვეყნის საექსპორტო შემოსავლები საგრძნობლად შეამცირა. როგორც ირკვევა, შექმნილი ვითარება მოსკოვის მოგების მარჟას მკვეთრად ავიწროებს.

არსებული ინფორმაციით, მაღალი ფასებისა და სანქციებთან დაკავშირებული ბარიერების გამო, ისეთმა მსხვილმა მყიდველებმაც კი, როგორიც ინდოეთია, რუსული ტვირთების მიღებაზე უარი თქვეს.

მნიშვნელოვანია ითქვას, რომ ევროპაში მიწოდების 20-დღიან ვადებთან შედარებით, აზიის მიმართულებით LNG-ის ტრანსპორტირებას მარშრუტის მიხედვით 50-დან 80 დღემდე სჭირდება.

პარალელურად, საზღვაო გადაზიდვის ხარჯები ევროპული მიმართულების შემთხვევაში თუ 1 მილიონ ბრიტანულ თერმულ ერთეულზე $1.00-$1.50-ს შეადგენდა, აზიის ბაზრისთვის ეს მაჩვენებელი $2.50-$5.00-მდე გაიზარდა.

რაც შეეხება მომავალ პერსპექტივას, ევროკავშირი 2027 წლის დასაწყისიდან რუსული თხევადი ბუნებრივი აირის იმპორტის სრულ აკრძალვას გეგმავს. მოსალოდნელი ემბარგო მოსკოვს აზიურ მხარესთან გრძელვადიანი მიწოდების ხელშეკრულებების გაფორმებას აიძულებს, თუმცა სხვა გლობალური ექსპორტიორების მხრიდან მზარდი კონკურენციისა და ფასდაკლებების პირობებში ამ კონტრაქტების მოპოვება მნიშვნელოვნად რთულდება.