რუსთაველის რეაბილიტაციის სამუშაოების დასრულების გადავადების ერთ-ერთი მიზეზი 29 ნალექიანი დღეა

რუსთაველის გამზირის სარეაბილიტაციო სამუშაოების დასრულების ვადა ერთი თვით გახანგრძლივდა. თბილისის მერიასა და პროექტის კონტრაქტორ კომპანია „სმარტ სოლუშენსს“ შორის 30 ოქტომბერს გაფორმებული ხელშეკრულების ცვლილებით, სამუშაოების შესრულების ვადა 100-დან 130 კალენდარულ დღემდე გაიზარდა. მიზეზად მითითებულია "რიგი გაუთვალისწინებელი მოვლენები და ნალექები". გახანგრძლივება შეეხო რეაბილიტაციის სამივე მონაკვეთს. სამუშაოების წარმოება დაიწყო 23 ივლისს და მისი ხანგრძლივობა შეადგენდა 100 დღეს, რაც 1 ნოემბრამდე ვადას მოიცავდა, ხოლო განახლებული ხელშეკრულება მოიცავს 2026 წლის 30 ნოემბრამდე პერიოდს. თავის მხრივ, მერიის პრესსამსახურში აცხადებენ, რომ რეაბილიტაციის პროცესი ნოემბერში დასრულდება.

30 ოქტომბერს გაფორმებულ ხელშეკრულების ცვლილებაში ვადის გახანგრძლივების მიზეზად კომპანია რამდენიმე გარემოებას ასახელებს. მათ შორისაა სამუშაოების მიმდინარეობისას გამოვლენილი გაუთვალისწინებელი ფაქტორები, რომლებმაც საპროექტო გადაწყვეტილებების შეცვლისა და სამუშაოების მოცულობის გაზრდის აუცილებლობა წარმოშვა. დოკუმენტის მიხედვით, სამუშაო პროცესს ასევე აფერხებდა სხვადასხვა კომუნიკაციის კომპანიის მიერ საკუთარ ქსელებზე მიმდინარე სარეაბილიტაციო სამუშაოები.

„უამინდობა ზღუდავს შესასრულებელ სამუშაოთა წარმოებას არა მხოლოდ წვიმიანი დღეების პერიოდში, არამედ შემდგომ, რამდენიმე დღის განმავლობაში“, - აღნიშნულია თბილისის მერიასა და „სმარტ სოლუშენსს“ შორის გაფორმებულ ხელშეკრულების ცვლილებაში.

ამავე დოკუმენტის მიხედვით, კომპანიას სამუშაოების შესრულების პროცესში გაუთვალისწინებელი ფაქტორების გამო საპროექტო გადაწყვეტილებების შეცვლა და სამუშაოების მოცულობის გაზრდა დასჭირდა. დამატებით შემაფერხებელ გარემოებად დასახელებულია კომუნიკაციების კომპანიები, რომლებიც რუსთაველის გამზირზე საკუთარ ქსელებს რეაბილიტაციას უტარებდნენ. „სმარტ სოლუშენსის“ განმარტებით, ამ სამუშაოების პარალელურად წარმოება მას ერთიანი სამუშაო ფრონტის არსებობას უზღუდავდა.

შედეგად, თავდაპირველად განსაზღვრული 100-დღიანი ვადა 130 კალენდარულ დღემდე გაიზარდა. კომპანიას ასევე დაევალა ხელშეკრულების შესრულების გარანტიის მოქმედების ვადის 2027 წლის 29 იანვრამდე გაგრძელება.

აღსანიშნავია, რომ რუსთაველის გამზირის რეაბილიტაციის მიმდინარეობისას „სმარტ სოლუშენსი“ სამუშაოების წარმოების პირობების დარღვევისთვის არაერთხელ დაჯარიმდა. მუნიციპალური ინსპექციის მიერ გამოვლენილი დარღვევები, მათ შორის, კონტრაქტით გათვალისწინებული 24-საათიანი სამუშაო რეჟიმის შეუსრულებლობას უკავშირდებოდა.

„სმარტ სოლუშენსი“ რუსთაველის გამზირის რეაბილიტაციის სამივე ლოტზე მუშაობს. კომპანიასთან გაფორმებული კონტრაქტების ჯამური ღირებულება დაახლოებით 19.8 მილიონ ლარს შეადგენს. პარალელურად, გამზირზე წყალმომარაგების, კანალიზაციისა და გაზმომარაგების ქსელების განახლების სამუშაოებიც მიმდინარეობს.