რუსულმა სავაჭრო პლატფორებმა - Wildberries-მა და Ozon-მა სომხური პროდუქტის გაყიდვები შეაჩერეს
2 მაისიდან სომეხ მეწარმეებს Wildberries-ისა და OZON-ის საშუალებით - რომლებიც უმსხვილესი რუსული ონლაინ რითეილერები არიან $1.89 მლრდ-ის წლიური შემოსავლით - ევრაზიის ეკონომიკური კავშირის (EAEU) ბაზარზე საკუთარი პროდუქციის გაყიდვა აღარ შეუძლიათ. ამის შესახებ სომხური მედია წერს.
სანამ სომეხი ექსპორტიორები პროდუქციის გატანის შეუძლებლობაზე ჩივიან, მყიდველები ადასტურებენ, რომ საქონლის შეძენისას დაბრკოლებებს არ აწყდებიან. ირკვევა, რომ EAEU-ს საქონლის ყიდვა შესაძლებელია, სომხურის გაყიდვა კი - არა.
თუმცა, Wildberries განმარტავს, რომ ეს ვითარება დაგროვილი შეკვეთების დიდი რაოდენობითაა გამოწვეული.
სოციალურ ქსელებში კომენტარები ადასტურებს, რომ ბევრი შეშფოთებულია საიტზე სომხური საქონლის ექსპორტის შეუძლებლობით და აღნიშნავენ, რომ „ტექნიკური ხარვეზის“ ან შეკვეთების დაგროვების მიზეზად დასახელება მხოლოდ საბაბია და არა რეალობა.
კომპანიის მიერ გავრცელებულ განცხადებაში ნათქვამია: „სამწუხაროდ, შეკვეთებზე დიდი ჩამორჩენის გამო, იძულებულნი ვართ დროებით შევაჩეროთ სომხეთიდან სხვა ქვეყნების მომხმარებლებისთვის ახალი შეკვეთების გაგზავნა. სომხეთის შიგნით მომხმარებლები შეკვეთების განთავსებას ჩვეულ რეჟიმში გააგრძელებენ. თუმცა, სხვა ქვეყნების მომხმარებლები ძიების შედეგებში დროებით ვეღარ დაინახავენ სომხეთში არსებულ პროდუქტებს, რადგან ისინი ვერ შეუკვეთენ ისეთ ნივთებს, რომელთა სწრაფად მიწოდებაც შეუძლებელია. გთხოვთ გაითვალისწინოთ, რომ მომავალში EAEU-ს ქვეყნებში მიწოდებისთვის შესაძლოა საჭირო გახდეს საქონლის წარმოშობისა და მათი სწორი რეგისტრაციის დამადასტურებელი დოკუმენტები.“
სომხეთში ამაში პოლიტიკურ ქვეტექსტს ხედავენ. ისმის მოსაზრებები, რომ რუსეთმა სომხეთის დასჯა ევროპული პოლიტიკური საზოგადოების მე-8 სამიტის წინ დაიწყო, რომელიც ერევანში გაიმართა.
სომხეთის ეკონომიკის მინისტრმა გევორგ პაპოიანმა ჟურნალისტებს განუცხადა, რომ „ყველაფერი რიგზეა.“
„ჩვენ ბევრად უფრო რთული პრობლემებიც მოგვიგვარებია, ყველაფერი რიგზეა. არანაირი პრობლემა არ არსებობს. რუსეთი ჩვენი პარტნიორია. ჩვენ რუსეთთან უფრო კარგად ვიმუშავებთ. ურთიერთობები რუსეთთან არასდროს ყოფილა ისეთი კარგი, როგორც ჩვენი მმართველობის პერიოდში,“ - განაცხადა პაპოიანმა.
2025 წელს სომხურმა სავაჭრო კომპანიებმა Wildberries-ის ბაზარზე გაყიდვების მოცულობა 122%-ით გაზარდეს. ამავე წელს Wildberries-ზე სომხეთიდან გამყიდველების რაოდენობა 106%-ით გაიზარდა.
BM.GE
წყარო: bm.ge