სააგენტოები ვალის დაბრუნების უნარს ზომავენ და არა - დემოკრატიის ხარისხს|რა იკითხება Moody's-ის ანგარიშში?
ეკონომისტ ზაზა ბროლაძის შეფასებით, საერთაშორისო სარეიტინგო სააგენტო Moody's-ის მიერ საქართველოს სუვერენული რეიტინგის კვლავ Ba2-ზე დატოვება, ხოლო პროგნოზის „სტაბილურამდე“ გაუმჯობესება მხოლოდ მიმდინარე ფინანსური სტატისტიკის ასახვაა და არა - ქვეყნის პოლიტიკური ან დემოკრატიული კურსის წარმატება. ამის შესახებ მან BMGTV-ის გადაცემა "წერტილში" განაცხადა, სადაც საქართველოს შესახებ Moody's-ის ბოლო ანგარიში გააანალიზა.
მისი შეფასებით, ქვეყნის სუვერენული რეიტინგი კვლავ დაბალ, სპეკულაციურ (Ba2) კლასში რჩება, ხოლო დაფიქსირებული ეკონომიკური ზრდა ეყრდნობა რუსულ მიგრაციასა და სხვა მყიფე, დროებით ფაქტორებს.
ეკონომისტი ხაზს უსვამს, რომ ხელისუფლება შეგნებულად ურევს ერთმანეთში ვალის გადახდის ტექნიკურ უნარსა და პოლიტიკურ ლეგიტიმურობას, რათა სააგენტოების ცივი ციფრები საკუთარი პოლიტიკის ვალიდაციად წარმოაჩინოს. რეალურად კი, ევროინტეგრაციის შეჩერება და ავტოკრატიული ტენდენციები ქვეყანას გრძელვადიან ეკონომიკურ და გეოპოლიტიკურ ჩიხში ტოვებს.
ზაზა ბროლაძემ Moody's-ის მიმოხილვიდან რამდენიმე აქცენტი გამოყო:
1. "გაუმჯობესება" სინამდვილეში მხოლოდ პროგნოზის ცვლილებაა და არა - რეიტინგის.
"მთავრობა და სამთავრობო მედია ამ ცნობას წარადგენენ, როგორც წარმატებას, თუმცა თავად რეიტინგი - Ba2, ანუ სპეკულაციური, „ჯანკ“ კლასი - უცვლელი დარჩა. შეიცვალა მხოლოდ პროგნოზი, ნეგატიურიდან სტაბილურამდე. აქვე გავიხსენოთ 2025 წლის მარტში თავად Moody's პოზიცია: მაშინ სააგენტომ ცალსახად დაწერა, რომ პროგნოზის გაუარესება გამოწვეული იყო პოლიტიკური რისკებით - "უცხოური გავლენის გამჭვირვალობის შესახებ" კანონით და ევროინტეგრაციის პროცესის შეფერხებით. სიტუაცია გაუმჯობესების მაგივრად გაუარესდა და საქართველოში ავტოკრატიის დაბეტონება გრძელდება: კანონი ძალაშია, EU-ინტეგრაცია 2028 წლამდეა შეჩერებული, ოპოზიციური პარტიების დახურვის მექანიზმიც შემოღებულია", - ამბობს ზაზა ბროლაძე.