საფრანგეთის სამხედრო-საზღვაო ძალებმა რუსული ჩრდილოვანი ფლოტის ნავთობტანკერი დააკავეს
საფრანგეთის ხელისუფლებამ რუსული ნავთობტანკერის, Tagor-ის დაკავების ფაქტი ოფიციალურად დაადასტურა.
არსებული ინფორმაციით, სამხედრო-საზღვაო ძალებმა სპეცოპერაცია ატლანტის ოკეანის სანაპიროდან 740 კილომეტრის დაშორებით განახორციელეს. როგორც გაირკვა, მურმანსკის პორტიდან გამოსული გემი სხვა ქვეყნის დროშის ქვეშ ცურავდა და ის რუსეთის ე.წ. ჩრდილოვან ფლოტს მიეკუთვნება.
ფლოტს, რომელიც ძირითადად დაძველებული ნავთობტანკერებისგან შედგება და კრემლს სანქცირებული წიაღისეული საწვავის უცხოურ ბაზარზე გატანაში ეხმარება.
მომხდარს საფრანგეთის პრეზიდენტი ემანუელ მაკრონი სოციალურ ქსელ X-ში უკვე გამოეხმაურა. მისი განცხადებით, ქვეყანა არ მისცემს რუსეთს უფლებას, საწვავი საერთაშორისო სანქციების გვერდის ავლით გაყიდოს და ამით უკრაინის წინააღმდეგ მიმდინარე ომი დააფინანსოს. აღსანიშნი ფაქტია, რომ პარიზმა ეს ოპერაცია დიდი ბრიტანეთის მხარდაჭერით ჩაატარა.
რაც შეეხება მოსკოვის პოზიციას, კრემლის პრესსპიკერმა დმიტრი პესკოვმა საფრანგეთის ქმედება მკაცრად დაგმო. მან ტანკერის დაკავებას უკანონო ნაბიჯი და "საერთაშორისო მეკობრეობა" უწოდა. პესკოვის განცხადებით, რუსული მხარე საკუთარი ტვირთების უსაფრთხოების უზრუნველსაყოფად ამ უარყოფით გამოცდილებას აუცილებლად გაითვალისწინებს. საფრანგეთში რუსეთის ელჩის ინფორმაციით, დაკავებული ხომალდის კაპიტანი რუსეთის მოქალაქეა.
ცნობისთვის, ეს მიმდინარე წელს საფრანგეთის მიერ რუსული გემის დაკავების უკვე მეოთხე შემთხვევაა. როგორც ცნობილია, ევროპული ქვეყნები მოსკოვის მიერ დასავლური სანქციების გვერდის ავლის მცდელობებს მკაცრად აკონტროლებენ.
BM.GE
წყარო: bm.ge