საფრანგეთში, რენუარის მუზეუმიდან €10 მილიონის ღირებულების ნამუშევრები მოიპარეს

სამხრეთ საფრანგეთის პოლიცია ორ მძარცველს ეძებს, რომლებიც ფრანგი იმპრესიონისტის, პიერ-ოგიუსტ რენუარის მუზეუმში შეიჭრა. მათ ხელოვნების ოთხი ნიმუში მოიპარეს, თუმცა გაქცევისას ერთ-ერთი მათგანი დაუვარდათ.

კან-სიურ-მერის მერის, ბრაიან მასონის განცხადებით, მძარცველები ქალაქის ვიდეოსამეთვალყურეო კამერებმა დააფიქსირეს. გაქცევისას მათ მოპარული ნახატებიდან ერთ-ერთი მიატოვეს. წინასწარი შეფასებით, მოპარული ნამუშევრების ღირებულება 9 მილიონ ევროზე მეტია. ამ ეტაპზე კონკრეტული ექსპონატების შესახებ ინფორმაცია არ საჯაროვდება.

ადგილობრივი ხელისუფლების ცნობით, მუზეუმში განგაშის სისტემა სამშაბათს, დილის 05:48 საათზე ამოქმედდა, პოლიცია კი შემთხვევის ადგილზე ხუთ წუთში მივიდა. რენუარის მუზეუმი, რომელიც კანსა და ნიცას შორის მდებარეობს, ხმელთაშუა ზღვისპირა ქალაქის ყველაზე პოპულარული ღირსშესანიშნაობაა.

მუზეუმი 1960 წლიდან ფუნქციონირებს და ის მხატვრის ბოლო საცხოვრებელი სახლი იყო. რენუარი აქ 1919 წელს, 78 წლის ასაკში გარდაიცვალა. კოლექცია მოიცავს მხატვრის მიერ შექმნილ პორტრეტებს, პეიზაჟებსა და "ნიუს" ჟანრის ნამუშევრებს, ასევე მის კუთვნილ ნივთებსა და ავეჯს.

ხელოვნების ნიმუშების გატაცების გახშირებული შემთხვევები

ეს ძარცვა მოხდა თითქმის ერთი თვის შემდეგ მას შემდეგ, რაც იტალიის პოლიციამ რენუარისა და რენესანსის ეპოქის სხვა მხატვრების ნახატები აღმოაჩინა. აღნიშნული ტილოები მარტში, ჩრდილოეთ იტალიაში მდებარე ვილიდან სამ წუთზე ნაკლებ დროში მოიპარეს.

ხელოვნების სფეროში დანაშაულის ექსპერტების განმარტებით, ცნობილ ნამუშევრებს ხშირად "შეკვეთით" იპარავენ, რადგან მათი გაყიდვა ლეგალური გზებით შეუძლებელია. ხშირ შემთხვევაში, ასეთი ნივთები კრიმინალურ სამყაროში სხვა უკანონო საქმიანობისთვის გირაოს სახით გამოიყენება.

საფრანგეთის მუზეუმებსა და გალერეებში უსაფრთხოების ზომები განსაკუთრებული კონტროლის ქვეშაა გასული წლის ოქტომბრის შემდეგ, როდესაც ლუვრიდან დღისით 100 მილიონი ევროს ღირებულების რვა ექსპონატი გაიტაცეს. ოთხი ეჭვმიტანილი დაკავებულია, თუმცა მოპარული ნივთების პოვნა, საერთაშორისო ძებნის მიუხედავად, ჯერჯერობით ვერ მოხერხდა.