საჰარის უდაბნოში გაზსადენის მშენებლობა დაიწყო

ჰორმუზის სრუტეში ტრანსპორტირების შეფერხების ფონზე, ალჟირმა საჰარის უდაბნოს გავლით ახალი გაზსადენის მშენებლობა დაიწყო, რომელიც ევროპელ მომხმარებლებს ნიგერიულ ბუნებრივ აირს მიაწვდის.

პროექტის ფარგლებში ალჟირული სახელმწიფო ენერგეტიკული კომპანია Sonatrach-ი 1,210 კილომეტრის სიგრძის მონაკვეთს ააშენებს. დასახელებული სეგმენტი აულეფის სამხრეთ-დასავლეთ რეგიონში არსებულ მოქმედ გაზსადენთა ქსელს შეუერთდება, საიდანაც საწვავის მიწოდება ევროპაში უკვე ხორციელდება.

პროექტის დასრულების შემდეგ, ტრანსსაჰარული გაზსადენი ევროპას ყოველწლიურად 30 მილიარდ კუბურ მეტრამდე ბუნებრივ აირს მიაწვდის. მილსადენის ალჟირული მონაკვეთი დედაქალაქ ალჟირის სამხრეთით მდებარე საბადოს დაუკავშირდება, რომელიც აფრიკის კონტინენტზე ბუნებრივი აირის უდიდეს რეზერვუარს წარმოადგენს.

რაც შეეხება პროექტის საერთო მასშტაბებს, მილსადენის მთლიანი სიგრძე ნიგერიის, ნიგერისა და ალჟირის გავლით 4,128 კილომეტრს შეადგენს, მისი საინვესტიციო ღირებულება კი $13 მილიარდით განისაზღვრა. პროექტის განხორციელება ათწლეულების განმავლობაში ფინანსური გაურკვევლობისა და უსაფრთხოების რისკების გამო ფერხდებოდა, რაც განსაკუთრებით ნიგერისა და ჩრდილოეთ ნიგერიის ტერიტორიებზე არსებულ გამოწვევებს უკავშირდება.