სამხრეთ კორეამ რეკორდული მოცულობის ბიუჯეტი წარადგინა - იგეგმება AI-ზე ხარჯების მკვეთრი ზრდა

სამხრეთ კორეის მთავრობამ 2027 წლისთვის რეკორდული, 821 ტრილიონი ვონის ($596.92 მლრდ.) მოცულობის ბიუჯეტის პროექტი წარადგინა. არსებული ინფორმაციით, ინიციატივა მიზნად გლობალური ტექნოლოგიური კონკურენციის ფონზე ხელოვნური ინტელექტის სექტორის გაძლიერებას ისახავს.

ქვეყნის ფინანსთა სამინისტროს განმარტებით, ხარჯვითი ნაწილი 2026 წელთან შედარებით 12.8%-ით გაიზარდა, რაც ისტორიაში ყველაზე მაღალი წლიური ზრდის მაჩვენებელია. შემოსავლების მატების ფონზე, სახელმწიფოს ვალის თანაფარდობა მთლიან შიდა პროდუქტთან 3.3 პროცენტული პუნქტით შემცირდება და 48.3%-ს მიაღწევს.

მნიშვნელოვანია ითქვას, რომ მომავალ წელს საგადასახადო შემოსავლები 40.7%-ით გაიზრდება და 584.4 ტრილიონ ვონს მიაღწევს. ამ მაჩვენებლის ზრდას ძირითადად ნახევარგამტარების ინდუსტრიიდან მიღებული რეკორდული შემოსავლები განაპირობებს. კერძოდ, ტექნოლოგიური გიგანტების, Samsung-ისა და SK Hynix-ის მოგება ხელოვნური ინტელექტისთვის საჭირო მაღალი გამტარუნარიანობის მეხსიერების ჩიპებზე გაზრდილმა მოთხოვნამ საგრძნობლად გაზარდა.

რაც შეეხება სახელმწიფო ობლიგაციების ემისიას, 2027 წელს სახაზინო ფასიანი ქაღალდების გაყიდვები 222.8 ტრილიონ ვონამდე შემცირდება.