სამხრეთ კორეის პრეზიდენტი უძრავი ქონების სკანდალში გაეხვა

სამხრეთ კორეის პრეზიდენტი უძრავი ქონების სკანდალში გაეხვია. როგორც ირკვევა, ლი ჯე მიუნგმა საკუთარი ბინა მის მიერვე შემოღებული კანონის დარღვევით გაყიდა.

კერძოდ, სახლის დროულად და ძვირად გასხვისებით დაინტერესებულმა ლიდერმა საკმარისი თანხის არმქონე დაინტერესებულ პირს ფული თავად ასესხა.

საუბარია ჯამურად $1.98 მილიონის ტრანზაქციაზე. განმარტებისთვის, დღეს სამხრეთ კორეაში რიგით მოქალაქეებს $140,000 დოლარზე მეტის იპოთეკური სესხის აღების უფლება არ აქვთ.

საზოგადოებასა და პოლიტიკურ სპექტრში ამ ფაქტის დამადასტურებელი დოკუმენტების გამოქვეყნებას მწვავე კრიტიკა მოჰყვა. ოპოზიციურმა პარტიებმა პრეზიდენტის მიერ გადადგმული ნაბიჯი დაგმეს და ლი ჯე მიუნგი მის მიერვე შექმნილი რეგულაციებისთვის გვერდის ავლაში დაადანაშაულეს. ვითარება გაამწვავა ამ საკითხზე ჟურნალისტებთან საუბრისას პრეზიდენტის ხუმრობამაც, თითქოს ბინის გაყიდვის შემდეგ ის უკვე უსახლკარო გახდა. ონლაინ სივრცეში მოქალაქეები უკმაყოფილებას გამოხატავენ, რადგან ერთი მხრივ, მათმა ლიდერმა ჩვეულებრივი ადამიანებისთვის საცხოვრებლის შესყიდვა გაართულა, მეორე მხრივ კი, როცა საქმე მის ქონებას შეეხო, თავად კანონს აარიდა თავი.

შეგახსენებთ, ლი ჯე მიუნგის მთავრობამ იპოთეკური სესხების გაცემის წესი ხელისუფლებაში მოსვლიდან მალევე მკვეთრად გაამკაცრა. მაშინ მოცემულობა იყო ის, რომ ბაზარზე საცხოვრებლების ფასი მკვეთრად იყო გაზრდილი და საშუალო ღირებულება $850,000 დოლარს აღწევდა. ანუ იმდენს, რამდენიც რიგითი კორეელი მოქალაქის 14 წლის ხელფასია.