სამხრეთის გაზის კორიდორს Moody's-მა Baa3 რეიტინგი მიანიჭა

საერთაშორისო საკრედიტო სააგენტო Moody's-მა პირველად სამხრეთის გაზის კორიდორს (SGC) Baa3 რეიტინგი მიანიჭა. რაც შეეხება პერსპექტივას, საკრედიტო სააგენტომ კორიდორს პოზიტიური პერსპექტივა განუსაზღვრა.

როგორც აზერბაიჯანის პროსამთავრობო სააგენტო Trend წერს, სამხრეთის გაზის კორიდორის რეიტინგი თანხვედრაშია აზერბაიჯანის სუვერენულ რეიტინგთან და ასახავს მის სტრატეგიულ მნიშვნელობას. საკრედიტო სააგენტო შეფასებისას ასევე ითვალისწინებს სახელმწიფოს პირდაპირ და არაპირდაპირ მონაწილეობას კომპანიის კაპიტალში. ამჟამად SGC-ის აქციების 49%-ს უშუალოდ აზერბაიჯანის სახელმწიფო ფლობს, ხოლო დარჩენილ 51%-ს - SOCAR-ი (რომელიც ასევე სახელმწიფო კომპანიაა).

Moody’s აღნიშნავს, რომ SGC-ის მთელი მიმდინარე დავალიანება უზრუნველყოფილია პირდაპირი სახელმწიფო გარანტიებით, რაც ხელს უწყობს კომპანიის რეიტინგების შესაბამისობას ქვეყნის სუვერენულ რეიტინგთან.

SGC მონაწილეობს გაზის მოპოვებაში შაჰდენიზის საბადოზე და ასევე ფლობს წილებს შემდეგ მილსადენებში:

• სამხრეთ კავკასიის მილსადენი (SCP); • ტრანსანატოლიური გაზსადენი (TANAP); • ტრანსადრიატიკული გაზსადენი (TAP);

ეს მილსადენები საერთო ჯამში ქმნის ერთიან საექსპორტო გაზის დერეფანს აზერბაიჯანიდან საქართველოსა და თურქეთის გავლით სამხრეთ ევროპაში. საქართველოზე გამავალ სამხრეთ კავკასიურ გაზსადენს წლიურად დაახლოებით 20 მლრდ მ3 გაზი გადააქვს.

ამავდროულად, Moody’s ყურადღებას ამახვილებს გარკვეულ გეოპოლიტიკურ რისკებზეც, რომლებიც დაკავშირებულია აზერბაიჯანის ირანთან სიახლოვესთან თუმცა, ამ დროისთვის ეს რისკები სააგენტოს მიერ ძირითადად პოტენციურ ჭრილში ფასდება.