Samsung-მა ხელოვნური ინტელექტის კომპანია Helix-ში $1 მილიარდი დააბანდა

სამხრეთ კორეულმა ტექნოლოგიურმა გიგანტმა Samsung-მა და მისმა შვილობილმა კომპანიებმა ხელოვნური ინტელექტის ინფრასტრუქტურულ ფირმა Helix Digital Infrastructure-ში $1 მილიარდი დააბანდეს.

როგორც ირკვევა, საინვესტიციო თანხიდან $500 მილიონი Samsung Electronics-მა გამოყო, დარჩენილი $500 მილიონი კი ჯგუფის ხუთმა შვილობილმა კომპანიამ დააფინანსა. პროექტში მონაწილე სუბიექტებს შორის Samsung C&T-ი, Samsung SDS-ი, Samsung SDI, Samsung Life Insurance-ი და Samsung Fire & Marine Insurance-ი სახელდებიან.

ახალი შეთანხმების საფუძველზე, სამხრეთ კორეული კონგლომერატი გლობალური მასშტაბით ხელოვნური ინტელექტის მონაცემთა ცენტრების გაფართოების პროცესში ჩაერთვება.

მნიშვნელოვანია ითქვას, რომ ამ ნაბიჯით Samsung-ი მიზნად შვილობილი სტრუქტურების ტექნოლოგიური პოტენციალის, მათ შორის ნახევარგამტარების, გაგრილების სისტემებისა და ენერგეტიკული ელემენტების სრულყოფილ გაერთიანებას ისახავს.

თავად Helix-ი კი ჰიპერმასშტაბური მონაცემთა ცენტრების, ელექტროენერგიის გენერაციისა და ოპტიკურ-ბოჭკოვანი ქსელების განვითარებას უზრუნველყოფს. ახალი ინფრასტრუქტურული ინიციატივა ხელოვნური ინტელექტის სწრაფი განვითარების პირობებში შექმნილ ენერგეტიკულ დეფიციტს უპასუხებს და გამოთვლითი ცენტრების სტაბილურ ფუნქციონირებას შეუწყობს ხელს.

აღსანიშნავია, რომ Helix-ი საინვესტიციო გიგანტმა KKR-მა, ტექნოლოგიურმა ლიდერმა Nvidia-მ, ამერიკულმა ენერგოკომპანია Vistra-მ და ქუვეითის საინვესტიციო სააგენტომ მიმდინარე წლის ივნისში დააფუძნეს. ახალშექმნილ გაერთიანებას Amazon Web Services-ის ყოფილი აღმასრულებელი დირექტორი ადამ სელიპსკი ხელმძღვანელობს.