Samsung-მა მომხმარებელთა კმაყოფილების რეიტინგში Apple-ს გადაასწრო

მობილური ტელეფონების მომხმარებელთა კმაყოფილების კვლევაში კომპანია Samsung-მა პირველი ადგილი დაიკავა და რეიტინგში Apple-ს გადაასწრო. ამერიკული მომხმარებელთა კმაყოფილების ინდექსის (ACSI) მიერ გამოქვეყნებული ანგარიშის მიხედვით, სამხრეთკორეულმა გიგანტმა 81 ქულა მოიპოვა, ამერიკულმა კორპორაციამ კი - 80 ქულა.

როგორც ირკვევა, Samsung-ის მომხმარებელთა კმაყოფილების ზრდა ახალი ფუნქციების ყოველდღიურ ეფექტურობასა და ელემენტის გამძლეობის 5%-იან გაუმჯობესებას უკავშირდება. ხელოვნური ინტელექტის ინტეგრაციამ, რომელიც ACSI-მ პირველად შეაფასა, 85 ქულა დაიმსახურა, რაც იმაზე მიუთითებს, რომ მომხმარებლები ახალ ტექნოლოგიას პრაქტიკულად იყენებენ.

სმარტფონების ფლაგმანურ მოდელებს შორის Samsung-ის ახალი Galaxy S-სერია 84 ქულით ლიდერობს, მეორე ადგილზე ახალი iPhone Pro-სერიაა 82 ქულით, Google-ის ფლაგმანებმა კი 80 ქულა დააგროვეს.

ACSI-ს კვლევა 26,963 მომხმარებლის გამოკითხვას ეფუძნება. აღნიშნული მონაცემები ელექტრონული ფოსტის მეშვეობით, გასული წლის აპრილიდან მიმდინარე წლის მარტამდე პერიოდში შეგროვდა.