საქართველო და აშშ ერთად ვცდილობთ ჩინეთთან ურთიერთობების გაღრმავებას - კობახიძე
ირაკლი კობახიძის განცხადებით "საქართველო და აშშ ერთად ვცდილობთ ჩინეთთან ურთიერთობების გაღრმავებას". როგორც მან ჟურნალისტებს განუცხადა, ასეთ დროს, როდესაც ჯო უილსონი, რომელიც მმართველ პარტიას წარმოადგენს, თავს ესხმის საქართველოს ჩინეთთან ურთიერთობების გაღრმავების გამო, ეს "აბსოლუტურად ალოგიკურია".
"ამ ალოგიკურობას აქვს ერთადერთი მიზეზი, ის იღებს დაკვეთებს, დავალებებს, რომლებიც არის მიმართული ჩვენი ხალხის ინტერესების წინააღმდეგ. ჩვენი ეროვნული ინტერესების წინააღმდეგ, თუმცა როგორც აქამდე არ ჰქონდა არავითარი განსაკუთრებული ფასი ჯო უილსონის განცხადებებს, ასევე იქნება მომავალში“, - ამბობს კობახიძე.
აღსანიშნავია, რომ 9 ივნისს, აშშ-ის წარმომადგენელთა პალატამ მიიღო კანონპროექტი, რომელიც დონალდ ტრამპის ადმინისტრაციას ავალებს დეტალურად შეისწავლოს საქართველოში რუსეთისა და ჩინეთის დაზვერვის სააგენტოების მოქმედება.
კანონპროექტის ავტორია რესპუბლიკელი კონგრესმენი ჯო უილსონი, რომელსაც საქართველოზე სხვა კანონპროექტებიც ჰქონდა მათ შორის, "ქართული ოცნების" ამერიკის მხრიდან არაღიარებაზე. პროექტი პალატამ დაჩქარებული პროცედურით განიხილა და ორპარტიული მხარდაჭერით მიიღო. დოკუმენტი ახლა სენატს უნდა გაეგზავნოს კენჭისყრისთვის. კანონპროექტის დამტკიცების შემთხვევაში აშშ-ის ძალოვანი უწყებების ხელმძღვანელებს 180 დღე აქვთ იმისთვის, რომ საქართველოში რუსეთ-ჩინეთის სადაზვერვო ქსელების შესახებ ანგარიში მოამზადონ.
BM.GE
წყარო: bm.ge