საქართველო ევროკავშირში თავშესაფრის მოთხოვნითა და დეპორტაციით ლიდერებში რჩება - ევროკომისია

ევროკომისიამ საქართველოს შესახებ 2026 წლის შეფასების ანგარიში გამოაქვეყნა, სადაც ყურადღება გამახვილებულია მიგრაციულ პროცესებსა და უვიზო მიმოსვლის რეჟიმის ფუნქციონირებაზე.

ანგარიშის მიხედვით, საქართველო კვლავ იმ უვიზო ქვეყნების სიის სათავეშია, რომელთა მოქალაქეებიც ევროკავშირის წევრ სახელმწიფოებში თავშესაფრის მოთხოვნით ყველაზე ხშირად მიმართავენ. კერძოდ, 2025 წლის განმავლობაში ევროკავშირში საქართველოს მოქალაქეების მიერ წარდგენილი თავშესაფრის განაცხადების რაოდენობამ 15 130 შეადგინა.

დოკუმენტში აღნიშნულია, რომ საქართველოს ხელისუფლებასთან რეადმისიის შეთანხმების განხორციელება დადებითად ფასდება, თუმცა ევროკავშირში უსაფუძვლო თავშესაფრის მოთხოვნების მაღალი მაჩვენებელი კვლავ გამოწვევად რჩება. გასულ წელს ევროკავშირიდან ქვეყნის დატოვების სავალდებულო გადაწყვეტილების შემდეგ საქართველოში 10 445 მოქალაქე დაბრუნდა. ამ მაჩვენებლით საქართველო ევროკავშირიდან დაბრუნებული პირების რაოდენობით მსოფლიოში მეორე ადგილზეა.

ევროკომისია ხაზგასმით მიუთითებს, რომ საქართველოს ხელისუფლებამ ეფექტური ნაბიჯები უნდა გადადგას ევროკავშირში არალეგალურად დარჩენილი და უსაფუძვლო თავშესაფრის მაძიებელი საქართველოს მოქალაქეების პრობლემის მოსაგვარებლად, რაც უვიზო მიმოსვლის შეჩერების მექანიზმის (VSM) ერთ-ერთ საკვანძო მოთხოვნას წარმოადგენს.